11 jasar almatylyq Los-Anjeleste Azııa kınosy festıvaliniń qyzyl kilemimen júrip ótti

NUR-SULTAN. QazAqparat – 11 jastaǵy almatylyq Sofı Manasıan Los-Andjeleste Búkilálemdik Azııa kınosy festıvali aıasynda qyzyl kilemmen júrip ótti, dep habarlaıdy QazAqparat tilshisi.

Nickelodeon telearnasyndaǵy Lip Sync Battle Shorties balalar shoýyna qatysý arqyly tek Qazaqstanda ǵana emes AQSh-ta da qatarlastarynyń arasynda tanymal bolǵan Sofı qýanyshty jańalyǵyn Instagram-paraqshasynda bólisti.

«Dúnıejúzilik Azııa kıno festıvali – 2019. Ashylýy keremet boldy, barlyq kórsetilimderde júzdesemiz», - dep jazdy 11 jastaǵy almatylyq.

Sofı qyzyl kilemmen qazaqstandyq dızaınerlerdiń biriniń qolynan shyqqan kóılekpen júrip ótken.

Aıta keteıik, Rústem Ábdirashevtiń «Qazaq handyǵy. Altyn taq», Ermek Tursynovtyń «Shyraqshy» jáne Farhat Sháripovtiń «Tulǵalyq ósý trenıngi» fılmderi AQSh-tyń Los-Andjeles qalasynda qarashanyń 6-y men 14-i aralyǵynda ótip jatqan Asian World Film Festival festıvaline qatysyp jatyr. Bul týyndylardy QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirgen.