11 ret ótkizilgen ekonomıkalyq forým Qazaqstanǵa ne berdi - sarapshy pikiri

NUR-SULTAN. QazAqparat - Osymen elordada 12-shi márte ótkizilgeli otyrǵan halyqaralyq ekonomıkalyq forýmdy Qazaqstan qalaı paıdasyna jaratýda? Bul suraqqa «Ekonomıkalyq zertteýler ınstıtýty» AQ Taldaý jáne álemdik ekonomıka ortalyǵynyń dırektory Aıbol Arǵynǵazınov jaýap berdi, dep habarlaıdy QazAqparat tilshisi.

«Mundaı is-sharalardyń nátıjesin qysqa merzimge qarap baǵalaý óte kúrdeli. Bul is-sharalar uzaq merzimdi. Eldiń ınvestıtsııalyq tartymdylyǵyn arttyrýǵa, ekonomıkalyq damý strategııasyn aıqyndaýǵa baǵyttalǵandyqtan, bur sharalardan bir kúnde áser keledi nemese aýqymdy ózgerister bolady dep kútý, menińshe, negizsiz. Aldaǵy uzaq merzimdi perspektıvada ol eldiń ekonomıkasyna sóz joq áserin tıgizedi», - deıdi Aıbol Arǵynǵazınov.

Ortalyq dırektorynyń aıtýyna qaraǵanda, osy 12 jyldyń ishinde forýmnyń negizinde jahandyq sarapshylardyń usynystaryn eskere otyryp, Qazaqstan óziniń birshama ekonomıkalyq reformalaryn iske asyrǵan.

«Men birneshe mysal keltireıin: eń birinshiden, qazirgi kezde bıznes júrgizýdiń jeńildigi boıynsha Qazaqstan álemdegi ozyq otyz eldiń qataryna kiredi. Dúnıejúzilik banktiń Doing Business reıtıngi boıynsha, 2018 jyly Qazaqstan 28-shi orynnan kórindi. Bul Eýropanyń jáne álemdegi damyǵan elderdiń ishinde ozyq kórsetkish bolyp sanalady. Sonymen qatar, sońǵy jyldary bıznestiń ashyqtyǵy, bıznes júrgizýdiń jeńildigi boıynsha 5-ten asa toptamalar júrgizildi. Áleýmettik-ekonomıkalyq reformalar boıynsha áleýmettik júıe boıynsha 3-ke jýyq toptama engizilip, sonyń nátıjesinde áleýmettik reformalardy ózderińiz kórip jatyrsyzdar. Al Qazaqstannyń ekonomıkalyq ósýi, basqa da negizgi túbegeıli makroekonomıkalyq kórsetkishterine keler bolsaq, onyń bári de álemdik ekonomıkanyń úderisterin eskere otyryp, qalypqa saı keldi dep esepteımiz», - degen pikirin bildirdi ortalyq dırektory.

Aıbol Arǵynǵazınov atap ótkendeı, QHR-da, Reseıde, elimizdiń basqa da saýda seriktesterinde ekonomıkalyq damýdyń qarqyny Qazaqstanǵa qaraǵanda tómendeý.

«Bul forýmnan keıin de birneshe usynystar toptamasy ázirlenip, ýákiletti organdarǵa joldanatyn bolady. Sol sebepti, biz forýmnyń ótkizilýin oryndy, maqsatqa saı dep esepteımiz», - deıdi ol.

Eske sala ketsek, «Ekonomıkalyq zertteýler ınstıtýty» AQ Basqarma Tóraǵasy Erlik Qarajan 16-17 mamyrda «Yntalandyrýshy ósim: Adamdar. Qalalar. Ekonomıkalar» taqyrybynda ótetin HІІ Astana ekonomıkalyq forýmyna qandaı áıgili meımandar keletinin jarııalaǵan bolatyn.

Óz kezeginde «Astana EKSPO-2017» UK» AQ Basqarýshy dırektory Rýslan Jemkov elordada ótetin Halyqaralyq ekonomıkalyq forýmǵa ketetin qarajattyń oryndy jumsalatynyn aıtqan edi.