11 ret qatarynan jeńiske jetken Rybakına: Aldaǵy match ta ońaıǵa túspeıdi
Tórtinshi aınalymda álemniń 39-raketkasy, belgııalyq Elıza Mertensti 6:4, 6:3 esebimen utqan qazaqstandyq tennısshi qatarynan 11 ret jeńiske jetti.
Sóıtip ol óziniń jeke rekordtyq kórsetkishin qaıta jańartty. Budan buryn Elena sporttyq mansabynda eki ret qatarynan jeti oıynda qarsylastarynyń meselin qaıtarǵan edi.
Sonymen qatar Elena Rybakına alǵash ret Maıamı masters týrnıriniń shırek fınalyna shyqty. Osyǵan deıin ol eki ret úshinshi aınalymǵa deıin jetken edi. 2021 jyly ıspanııalyq Sara Sorrıbes-Tormoǵa 1:6, 6:3, 2:6 esebimen jol berse, ótken jyly amerıkalyq Djessıka Pegýladan asa almady – 3:6, 4:6. Bıyl E.Rybakına álemniń 3-raketkasy D.Pegýlamen kezdesip qalýy ábden múmkin. Eger ekeýi de jartylaı fınalǵa shyqsa, joldary toqaılasady.
Qazaqstandyq sportshy E.Mertenspen ótken oıynnyń óte aýyr tıgendigin aıtty.
«Taǵy da sátsiz bastadym, degenmen eki setpen bitkenine qýanyshtymyn. Árıne, fızıkalyq turǵyda men jaqsy babymda emespin, áıtse de sol qıyndyqtan ótip, óz jolymdy tapqanyma baqyttymyn. Shırek fınalǵa shyǵý – úlken jetistik, erteń odan da jaqsy oınaımyn dep úmittenemin», dedi E.Rybakına.
Rybakına sondaı-aq álemniń 24-raketkasy, ıtalııalyq Martına Trevızanmen ótetin aldaǵy matchtyń da ońaıǵa túspeıtinin jetkizdi.
«Qarsylasym solaqaı. Sondyqtan oǵan beıimdelýge týra keledi, taǵy bir qıyndyǵy, biz osyǵan deıin bir-birimizben oınaǵan emespiz. Men tezirek qalpyma kelip, tyńaıýǵa tyrysamyn», dedi qazaqstandyq sportshy.
E.Rybakınanyń shırek fınaldyq matchy 29 naýryzǵa qaraǵan túni bolady, naqty ýaqyty keıin anyqtalady.
Eske sala keteıik, budan buryn Elena Rybakınanyń Maıamı masters týrnıriniń tórtinshi aınalymyna shyqqanyn jazǵan bolatynbyz.
Sondaı-aq álemniń eks-ekinshi raketkasyn jeńgen Rybakına matchtyń óte aýyr bolǵanyn aıtty.
Qazaqstan jasóspirimderi tennısten álem chempıonatyna irikteý satysyn sátti bastady.
Qazaqstandyq tennısshi Frantsııada negizgi týrnırge joldama aldy.