1,1 mıllıon gektar aýmaq shegirtke zııankesterine qarsy óńdeldi
Aıta keteıik, Qostanaı oblysy Aqtóbe jáne Túrkistan oblystarymen birge bıyl shegirtkeniń eń kóp taralýy boljanatyn óńirlerdiń qataryna engen. Jalpy, munda 775,6 myń gektar aýmaqta jumys júrgizý josparlanyp otyr. Búgingi tańda 57 arnaıy tehnıkanyń kómegimen 120 myń gektardan astam alqap óńdeldi. Aýa raıynyń qolaısyzdyǵyna baılanysty Arqalyq qalasynda, Amangeldi, Jangeldi, Qamysty jáne Naýyrzym aýdandarynda keshki jáne tańǵy ýaqytta hımııalyq óńdeý jumystary júrgizilip jatyr. Sonymen qatar 500-ge jýyq adam, onyń ishinde fıtosanıtarlyq dıagnostıka ortalyǵynyń 129 sarapshysy qamtylǵan monıtorıngtik is-sharalar jalǵasýda. Mamandar 339 myń gektar jerdi zerttedi.
Mınıstr Amangeldi aýdany, Arqalyq qalasyndaǵy birneshe sharýa qojalyqtaryn, egis jumystary jalǵasyp jatqan alqaptardy aralap kórdi, sharýa qojalyqtarynyń basshylarymen jáne merdigerlermen kezdesti.
«Qazaqstan Respýblıkasy Úkimetiniń qoldaýymen shegirtke zııankesterimen kúres belsendi jalǵasyp jatyr. Bul másele Premer-Mınıstrdiń erekshe baqylaýynda. Bizdiń aldymyzda shegirtke zııankesterimen kúresti tıimdi uıymdastyrý mindeti tur. Qajetti kólemde dári-dármek satyp alý jáne jumysty bastaý boıynsha der kezinde qabyldanǵan sharalardyń nátıjesinde josparlanǵan 2,5 mıllıon gektar zalalsyzdandyrý alańynyń 1,1 mıllıon gektardan astamy óńdeldi. Tehnıka jetkilikti, óńirler dári-dármekpen qamtamasyz etilgen. Barlyq óńdeý jumysy josparǵa saı júrgizilýde», — dedi Aıdarbek Saparov.
Buǵan deıin habarlanǵanyndaı, Aqtóbede shegirtkeniń jappaı kóbeıýi tirkeldi. Arysty da shegirtke basyp jatyr. Bul jándik Túrkistan oblysynyń sharýalaryn ábigerge saldy. Sondaı-aq Premer-mınıstrdiń orynbasary Serik Jumanǵarın elge shegirtke qaptatyp alǵanymyzdy jasyrmaıtynymyzdy aıtty.
«Respýblıkalyq fıtosanıtarııalyq dıagnostıka jáne boljamdar ádistemelik ortalyǵy» Aqtóbe oblystyq fılıalynyń basshysy Garıfýlla Jolaevtyń aıtýynsha, shegirtkeniń shyǵýy 10-12 jyl saıyn qaıtalanyp turady. 2023 jyldan bastap kóterilip, bıyl sharyqtaý shegine kelip jetti. Onyń aldynda 2013-2014 jyldary tirkelgen.
«Italııalyq prýs jándiginiń otany — Yrǵyz, Shalqar, Áıteke bı aýdandaryndaǵy qumaqtar. Shalqardyń Uly Borsyq qumy, Kishi Borsyq qumy, Yrǵyzdyń Aıyrqyzyl qumy, Áıteke bı aýdanynyń Mamyt qumynan ushyp shyǵyp, taraıdy. Al bizde qumǵa kirip, monıtorıng jasaýdyń múmkindigi joq. Qum ishinde bizdiń tehnıka júrmeıdi. Ári qumdy aýmaqtyń aýdany úlken, birneshe shaqyrymǵa sozylyp jatyr. Ókinishke qaraı qanshalyqty ushyp ótkenin, qanshalyqty kóp jumyrtqa salǵanyn bile almaımyz. Jylda osy máseleni, qumnyń ishin baqylaý jaıyn kóteremiz. Qazir dronmen ýlaýǵa da múmkindik bar eken. Eger sol iske asyp, oń jolǵa qoıylsa, osyny paıdalanýǵa bolady. Ázirge joba ǵana. Dronnyń ózi 8 shaqyrymǵa ǵana usha alady, al qumnyń aýmaǵy birneshe shaqyrymǵa sozylǵan. Eger der kezinde shara qoldanbasaq, ushyp shyǵady. Qazir bar múmkindikti paıdalanyp, ýlaý jumysyn júrgizip jatyr», — deıdi maman.