11 qańtar. Tulǵalar týǵan kún
61 jyl buryn (1963) ánshi, Qazaqstannyń halyq ártisi, Qazaqstan Memlekettik syılyǵynyń laýreaty, «Jiger» festıvaliniń, Halyqaralyq «Azııa daýysy» baıqaýynyń laýreaty, «Tarlan» syılyǵynyń ıegeri Maqpal Muhamedııarqyzy JÚNІSOVA dúnıege keldi.
Qaraǵandy oblysynyń Egindibulaq aýdanynda týǵan. Shymkent mádenıet ınstıtýtyn bitirgen.
Óner jolyn «Gúlder» ansambliniń quramynda halyq ánderin oryndaýshy retinde bastap, odan keıin «Qazaqkontsert» birlestiginiń janynan «Nazerke» ansamblin uıymdastyrǵan.
Repertýarynda qazaq halyq ánderimen qatar, qazirgi qazaq kompozıtorlarynyń mýzykalyq shyǵarmalary bar. Ánshi lırıkalyq ánderdi naqyshyna keltire oryndaýymen erekshelenedi.
59 jyl buryn (1965) Qazaqstan Respýblıkasy Premer-mınıstriniń orynbasary Tamara Bosymbekqyzy DÚISENOVA dúnıege keldi.
Ońtústik Qazaqstan oblysynda týǵan. 1987 jyly Tashkent halyq sharýashylyǵy ınstıtýtyn bitirdi, mamandyǵy – ınjener-ekonomıst, ekonomıka ǵylymdarynyń kandıdaty.
Eńbek jolyn 1988 jyly ınstıtýtty aıaqtaǵannan keıin Ońtústik Qazaqstan oblysy Saryaǵash aýdanyndaǵy orta mekteptiń ınformatıka pániniń muǵalimi qyzmetinen bastady. 1988-1992 jyldary Ózbek SSR-niń Memlekettik josparlaý komıtetiniń Ekonomıka ǵylymı zertteý ınstıtýtynyń ekonomısi bolyp jumys istedi. 1992-1993 jyldary Ońtústik Qazaqstan oblysy Saryaǵash aýdandyq ákimshiliginiń aǵa ekonomısi, 1993-1994 jyldary «Perızat-holdıng» kompanııasynyń bólim basshysy, 1994-1997 jyldary Saryaǵash aýdany ákiminiń keńesshisi, orynbasary, birinshi orynbasary, 1997-1999 jyldary Shymkent qalasy ákiminiń birinshi orynbasary, 1999-2002 jyldary Ońtústik Qazaqstan oblysy ákiminiń orynbasary, 2002-2006 jyldary QR Eńbek jáne halyqty áleýmettik qorǵaý mınıstrliginiń vıtse-mınıstri, 2006-2008 jyldary Ońtústik Qazaqstan oblysy ákiminiń orynbasary, 2008-2013 jyldary QR Eńbek jáne halyqty áleýmettik qorǵaý mınıstrliginiń jaýapty hatshysy, Eńbek jáne halyqty áleýmettik qorǵaý vıtse-mınıstri (02.2013-06.2013) qyzmetin atqardy. 2013-2014 jyldary QR Eńbek jáne halyqty áleýmettik qorǵaý mınıstri, 2014-2017 jyldary QR Densaýlyq saqtaý jáne áleýmettik damý mınıstri, 2017-2018 jyldary Eńbek jáne halyqty áleýmettik qorǵaý mınıstri qyzmetinde boldy. 2018-2019 jyldary «Nur Otan» partııasynyń hatshysy, 2019-2020 jyldary «Eńbek resýrstaryn damytý ortalyǵy» AQ jetekshisi, 2020-2022 jyldary QR Prezıdentiniń kómekshisi – QR Prezıdenti Ákimshiliginiń ótinishterdi qaraýdy baqylaý bóliminiń meńgerýshisi bolyp jumys atqardy. 2022-2023 jyldary QR Eńbek jáne halyqty áleýmettik qorǵaý mınıstri qyzmetinde boldy.
Qazirgi laýazymyna 2023 jyldyń qyrkúıeginde taǵaıyndaldy.
«Qurmet» ordenimen, «Qazaqstan Respýblıkasynyń táýelsizdigine 10 jyl» (2001), «Qazaqstan Konstıtýtsııasyna 10 jyl» (2005) medaldarymen marapattalǵan.
54 jyl buryn (1970) Qazaqstan Respýblıkasynyń kólik vıtse-mınıstri Sátjan Aıtenuly ABLALIEV dúnıege keldi.
Atyraý oblysynda dúnıege kelgen. Almaty avtomobıl-jol ınstıtýtyn jáne Qazaq qatynas joldary ýnıversıtetin bitirgen.
Eńbek jolyn 1987 jyly Ońtústik Embi munaı barlaý ekspedıtsııasy Ortalyq ınjenerlik-tehnıkalyq qyzmetiniń operatory bolyp bastaǵan. 1996-2004 jyldary Qazaq kólik jáne kommýnıkatsııa akademııasynda jumys istedi.
Baǵanyń qurylý metodologııasy jáne satyp alý basqarmasy jobalaý bóliminiń bastyǵy, Qurylys jáne qaıta jańartý basqarmasynyń bastyǵy, Avtomobıl joldary komıtetiniń syrtqy qaryzdar jáne kontsessııalyq jobalar jáne Qazaqstan Respýblıkasynyń Kólik jáne kommýnıkatsııa mınıstrliginiń qurylys ınfraqurylymynyń kesheniniń basqarmasynyń bastyǵy, Qazaqstan avtojolshylar qaýymdastyǵynyń prezıdenti, Qazaqstan Respýblıkasy Kólik jáne kommýnıkatsııa mınıstrligi Avtomobıl joldary komıtetiniń tóraǵa orynbasary bolyp eńbek etken. 2014-2019 jyldary QR Investıtsııalar jáne damý mınıstrligi Avtomobıl joldary komıtetiniń tóraǵa orynbasary qyzmetin atqardy. 2019-2021 jyldary QR Indýstrııa jáne ınnovatsııalyq damý mınıstrligi Avtomobıl joldary komıtetiniń tóraǵa orynbasary bolyp jumys istedi. 2021-2023 jyldary Soltústik Qazaqstan oblysy ákiminiń orynbasary qyzmetin atqardy.
2023 jyldyń qazan aıynan bastap qazirgi qyzmetinde.
«Qurmet» ordenimen (2020); «Eren eńbegi úshin», «Qazaqstan Respýblıkasynyń táýelsizdigine 25 jyl» medaldarymen marapattalǵan.
51 jyl buryn (1973) «Qazaqstan qor bırjasy» (KASE) AQ basqarma tóraıymy Alına Ótemisqyzy ALDAMBERGEN dúnıege keldi.
Qaraǵandy qalasynda týǵan. Qazaq memlekettik basqarý akademııasyn (1995) «Qarjy jáne nesıe» mamandyǵy boıynsha, Vashıngton ýnıversıtetiniń Іskerlik ákimshiliktik basqarý mektebin (1995), Rochester ýnıversıtetiniń Ýılıam E. Saımon atyndaǵy Іskerlik ákimshiliktik basqarý mektebin (2007) ekonomıst, iskerlik ákimshilik magıstri mamandyǵy boıynsha bitirgen.
1997-2001 jyldary – «ABN AMRO Qazaqstan banki» EAB» JAQ qurylymdyq qarjylandyrý basqarmasynyń qarjylyq taldaýshysy, menedjeri, bas mamany, bastyǵynyń orynbasary, nesıelik taldaý jáne qurylymdaý basqarmasy bastyǵynyń orynbasary. 2001-2003 jyldary – London qalasyndaǵy «ABN AMRO Bank N.V.» reıtıngtik keńester berý departamentiniń reıtıngtik keńes berýshisi, jetekshi reıtıngtik keńes berýshisi. 2003-2005 jyldary – «OOIÝPA» ABN AMRO Asset Management» AQ basqarmasynyń tóraǵasy. 2005-2006 jyldary «ABN AMRO Qazaqstan banki» EAB» AQ basqarmasynyń qazynashysy, tóraǵasynyń orynbasary. 2006-2007 jyldary – Almaty qalasyndaǵy QR Aımaqtyq qarjy ortalyǵy qyzmetin retteý agenttigi tóraǵasynyń orynbasary. 2008 jyldyń qańtarynan – «Astana-Fınans AQ basqarmasy tóraǵasynyń orynbasary, sol jyldyń naýryzynan – QR Qarjy naryǵyn jáne qarjylyq uıymdardy retteý men baqylaý agenttigi tóraǵasynyń orynbasary qyzmetin atqarǵan. 2011 jyldan «Samuryq-Qazyna Fınans» JShS Bas dırektorynyń orynbasary, 2012-2013 jyldary – Bas dırektory bolyp jumys istedi. Ár jyldary «Qazaqstan qor bırjasy» AQ, «BTA Bank» AQ, «Temirbank» AQ, «Alıans Bank» AQ Dırektorlar keńesterinde mindetterin atqardy. 2013-2016 jyldary «Báıterek UBH» Basqarma tóraǵasynyń orynbasary laýazymyn atqarǵan, ári basqarma múshesi boldy.
2016 jyldyń aqpan aıynan bastap qazirgi qyzmetinde.
46 jyl buryn (1978) Quqyq qorǵaý organdary akademııasynyń prorektory, Vedomstvoaralyq ǵylymı-zertteý ınstıtýtynyń dırektory Gúlnar Káribaıqyzy ShÝShIKOVA dúnıege keldi.
Qaraǵandy oblysynda dúnıege kelgen. E.A. Bóketov atyndaǵy Qaraǵandy memlekettik ýnıversıtetin bitirgen (quqyqtaný), «Qarjy akademııasy» AQ (ekonomıka jáne bıznes).
Eńbek joly: 1999-2000 jyldary Qaraǵandy oblystyq sotynyń sot otyrysynyń hatshysy, 2000-2001 jyldary Qaraǵandy qalasy Oktıabr aýdany prokýrorynyń kómekshisi, 2001 jyly Keńes aýdany prokýrorynyń kómekshisi. 2001-2004 jyldary Qaraǵandy oblysy prokýratýrasynyń azamattyq ister boıynsha sot qaýlylarynyń zańdylyǵyn qadaǵalaý basqarmasynyń prokýrory, 2004-2008 jyldary Qaraǵandy oblysy, odan keıin Astana qalasy prokýratýrasynyń ákimshilik jáne azamattyq ister boıynsha sot qaýlylary men atqarýshylyq is júrgizýdiń zańdylyǵyn qadaǵalaý basqarmasynyń prokýrory, 2008-2009 jyldary QR Bas prokýratýrasynyń Kadr jumysy jáne ishki qaýipsizdikti qamtamasyz etý departamenti basqarmasynyń prokýrory, aǵa prokýrory qyzmetin atqardy. 2009-2013 jyldary QR Bas prokýrory apparatynyń uıymdastyrý-ınspektorlyq basqarmasynyń, QR Bas prokýrorynyń aǵa kómekshisi, 2013-2015 jyldary QR Bas prokýrory apparaty uıymdastyrý-baqylaý basqarmasynyń bastyǵy, 2015-2018 jyldary QR Bas prokýratýrasy kadr jumysy departamenti bastyǵynyń orynbasary, 2018 jyly QR Bas prokýratýrasy kadrlyq damý departamentiniń bastyǵy, 2018-2019 jyldary quqyq qorǵaý organdary akademııasynyń prorektory bolyp jumys istedi.
2019 jylǵy qańtardan bastap qazirgi laýazymynda.
77 jyl buryn (1947-2014) Qazaqstannyń eńbek sińirgen óner qaıratkeri, QR memlekettik syılyǵynyń laýreaty, qazaq teatrtanýshysy Áshirbek SYǴAI dúnıege keldi.
Ońtústik Qazaqstan oblysy Kentaý qalasynda týǵan. Qazaq óner ınstıtýtyn aıaqtaǵan (1969).
Eńbek jolyn «Achpolımetall» kombınaty janyndaǵy Kentaý mehanıkalyq jóndeý tsehynda slesar bolyp bastaǵan. 1965 jyly Qurmanǵazy atyndaǵy konservatorııaǵa túsip, ony 1969 jyly támamdaǵan soń ol ustazdyq qyzmetke qaldyrylǵan. Onyń teatr synshysy retinde qalyptasýy 1970 jyldardan bastaldy. 1974-1994 jyldary Mádenıet mınıstrligi teatr bóliminiń, óner basqarmasynyń bastyǵy, mınıstrdiń orynbasary, T. Júrgenov atyndaǵy teatr jáne kıno ınstıtýtynyń rektory, mınıstrdiń birinshi orynbasary bolyp qyzmet atqardy. Onyń qalamynan «Іńkár shaq», «Syr sandyq», «Sahnaǵa sapar», «Jarnama aldyndaǵy oı», «Sahna sańlaqtary» degen kitaptar jaryq kórdi. Jan Molerdiń «Eriksiz úılený», K. Goldonıdiń «Kúlkili oqıǵa», O. Ioselıanıdiń «Arbanyń izimen», Sh. Rokvıdiń «Mazasyz ájeı», V. Ejovtyń «Bulbuldar túni», A. Shaıkevıchtiń «Álem alaqanymyzda» jáne taǵy basqa tanymal dramatýrgterdiń pesalaryn aýdardy. Olar respýblıka teatrlarynda qoıyldy. 1992-1994 jyldary memlekettik nagradalar jáne syılyqtar jónindegi komıtetterdiń múshesi boldy. 1993 jyly Memleketimizdiń ult saıasaty jónindegi keńesiniń múshesi bolyp bekitildi. 1989 jyly Qazaqstan Respýblıkasynyń eńbek sińirgen kaıratkeri ataǵy berildi. 2001 jyly QR Memlekettik syılyǵynyń laýreaty atandy. Ol Qazaqstan Jazýshylar odaǵynyń múshesi. Qazaqstan Jazýshylar odaǵy basqarmasynyń hatshysy.