100 jańa oqýlyqty tegin oqıtyn portalǵa 170 myńnan astam adam tirkeldi
Bul týraly «Rýhanı jańǵyrý» qazaqstandyq qoǵamdyq damý ınstıtýtynyń basqarma basshysy Dýman Janpeıisov aıtyp berdi, dep habarlaıdy QazAqparat tilshisi.
«100 jańa oqýlyq» jobasy aıasynda memleket tarapynan oqýlyqtardy kópshilikke taratý boıynsha úlken jumys atqaryldy. Sondyqtan, bul kitaptar elimizdiń oqý oryndary men kitaphanalaryna jetkizilip qana qoıǵan joq, OpenU arnaıy portaly ashyldy. Portalda kez kelgen adam osy eńbektermen tanysyp, oqı alady», - dedi D. Janpeıisov QazAqparat tilshisine bergen suhbatynda.
Sonymen birge portalda jınaqtalǵan elimizdiń jetekshi mamandarynyń dáristeri barshaǵa qoljetimdi.
«Keı eńbekter júzdegen betterden quralǵan jáne adamdardyń barlyq kontentti oqýǵa ýaqyty bolmaýy múmkin. Munda memleket elimizdiń jetekshi ǵalymdaryn shaqyryp, belgili bir ǵylymdar boıynsha negizgi bilimdi qysqasha qorytyndylaǵan formada usynady. Portalda elimizdiń jetekshi ǵalymdarynyń beınedáristerin kórýge bolady. Buryndary joǵary bilikti mamandardyń dárisi barlyq JOO-ǵa, barlyq stýdentke buıyra bermeıtin. Al munda kez kelgen oqý ornynyń kez kelgen stýdenti ózin qyzyqtyrǵan sala boıynsha dáristerdi qaraı alady. Atalǵan resýrsqa 120-dan astam JOO, 100-den astam kolledj qosylǵan, 170 myńnan astam qoldanýshy tirkelgen. Bul – óz keleshegi úshin jańa bilimge sýsaǵan úlken top», - dep túsindirdi spıker.