«100 jańa oqýlyq» stýdentterge úlken ómirlik azyq bolady - EUÝ rektory

ASTANA. QazAqparat - «100 jańa oqýlyq» jobasy aıasynda aýdarylǵan kitaptar mindetti túrde JOO-nyń bilim baǵdarlamasynda qamtylady. Bul týraly L.N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov málim etti, dep habarlaıdy QazAqparat tilshisi.

«100 jańa oqýlyq» jobasy Elbasynyń tapsyrmasymen iske asqan asa qajetti qadam. Sonyń negizinde taıaý arada 100 oqýlyq tolyqtaı qazaq tilinde paıda bolady, onyń ishinde 18-i tanystyryldy. Óte kerek kitaptar. Arnaıy komıssııanyń sheshimimen atalǵan kitap aýdarmaǵa jiberildi. Atap aıtqanda, aýdarmashylar retinde Qazaqstandaǵy tıisti salanyń bilikti mamandary tartyldy. Sondyqtan aýdarylǵan oqýlyqtarǵa qatysty qoǵamda oń pikir aıtylyp jatyr. Bul baǵyttaǵy jumystar mýltıplıkatıvtik nátıje beredi. Osy oraıda aýdarma kenje qalyp qoıǵan salany kóterýge jol ashady. Óıtkeni ol kez kelgen ulttyń tilin, termınologııalyq qorjynyn keńeıtedi, jańa uǵymdar enedi» - dedi EUÝ rektory. 

Sonymen qatar ýnıversıtet basshysy búginde qazaq tilinde oqıtyn stýdentter sany aıtarlyqtaı artqanyn atap ótti.

«Bul jaı ǵana aýdarma emes, ıaǵnı aldyńǵy qatarly ozyq oqýlyqtar qazaq tiline túsirildi. Sol kitaptar arqyly tilimizge jańalyq engizemiz. Qazaq tilinde oqıtyn stýdentter men toptardyń sany jyl saıyn artyp keledi, sáıkesinshe, tilimizge qyzyǵýshylyq erekshe. Sondyqtan aýdarylǵan oqýlyqtar bilim baǵdarlamasyna engiziletindikten, stýdentterdiń oqýynda jeńildik bolatynyn bildiredi. Gýmanıtarlyq baǵyttaǵy kafedralardy kúsheıtý tapsyrmasy júkteldi. Myna oqýlyqtar sol kafedralarda qyzmet etetin muǵalimderge de, oqıtyn stýdentterge de úlken ómirlik azyq», - dedi Erlan Sydyqov.

Aıta keteıik, «100 jańa oqýlyq» jobasy aıasynda ozyq kitaptardy aýdarý isine Eýrazııa ulttyq ýnıversıtetiniń de oqytýshylary men ǵalymdary qatysty.

Eske salsaq, bıyl 12 sáýirde «Qazaq tilindegi 100 jańa oqýlyq» jobasy aıasynda aýdarylǵan alǵashqy kitaptar QR Prezıdenti Nursultan Nazarbaevqa tanystyrylǵan bolatyn.