«100 jańa oqýlyq» kitaptary dúkende satyla bastady

ASTANA. QazAqparat - «Jańa gýmanıtarlyq bilim. Qazaq tilindegi 100 jańa oqýlyq» jobasy boıynsha shyqqan kitaptar «Meloman» dúkenderinde satyla bastady. Bul týraly málimetti «Ulttyq aýdarma bıýrosy» qoǵamdyq qorynyń atqarýshy dırektory Raýan Kenjehanuly Feısbýktegi paraqshasynda jarııalady, dep habarlaıdy QazAqparat.

Raýan Kenjehanulynyń jazýynsha, «100 jańa oqýlyqqa» engen kitaptardyń elektrondy nusqalaryn www.OpenU.kz (Qazaqstannyń ashyq ýnıversıteti) saıtynan tegin oqýǵa bolady.

«Oqýlyqtardy dúkenge shyǵarý kitapty satyp alǵysy keletin kópshiliktiń suraýy boıynsha arnaıy uıymdastyryldy. Memlekettik tapsyrys boıynsha shyqqan ár kitaptyń 10 myń dana taralymy 110 oqý ornyna tegin taratyldy. Satylyp jatqan kitaptar odan bólek, qosymsha basyldy. Alǵashqy 18 oqýlyqtyń dúkendegi quny kitap kólemine qaraı 1 790 (198 bet) teńgeden 7 850 (831 bet) teńge aralyǵynda. Jaqyn arada bul oqýlyqtarǵa onlaın dúkender arqyly budan da arzan baǵamen tapsyrys berýge bolady», - dep jazady Raýan Kenjehanuly.