«100 jańa esim» jobasyna qatysyp jatqan arýlar kimder
«100 jańa esim» tizimine enýge úmitti arýlar:
Indıra Edilbaeva
Ulttyq jobaǵa qatysýshylar arasynda qazaqstandyq ánshi Indıra Edilbaeva bar. Boıjetken «Ýkraına daýysy» (2020 j.) jáne «Qazaqstan daýysy» (2015 j.) vokaldyq televızııalyq shoýlarynyń fınalısi bolǵan. Ol Qudaıbergen Jubanov atyndaǵy Aqtóbe óńirlik ýnıversıtetiniń aǵylshyn jáne nemis tilderi boıynsha aýdarma fakýltetin bitirgen.
Ardana Botaı
Aǵa leıtenant Ardana Botaı – Sý-30 SM joıǵysh ushaǵyn tizgindeıtin álemdegi jalǵyz arý. Qazaqstan Áýe qorǵanysy kúshteri quramynda qyzmet atqaryp jatqan jyldar ishinde ol An-26, L-39 jáne Sý-30 sm ushaqtaryn basqarýdy meńgergen. Kúndelikti ómirde Ardana mýzyka tyńdaǵandy, kitap oqyǵandy jáne sportpen shuǵyldanǵandy unatady.
Mýza Sháımerdenova
Mýza búginde halyqtyń osal toptarynyń áleýmettik máselelerin sheshýge eleýli úles qosyp júr. Birneshe jyldan beri qaıyrymdylyqpen aınalysyp keledi. Janashyr adamdardyń kómegimen qazaqstandyq otbasylarǵa qoldaý kórsetildi. Nátıjesinde, muqtaj jandar azyq-túlik, dári-dármek, jıhaz, tehnıka jáne balalar arbalaryn aldy.
Zalına Alıeva
Boıjetken - «Bart» bı ansambliniń, «Vaınah» sheshen-ıngýsh etno-mádenı birlestigi jastar qanatynyń jáne Batys Qazaqstan oblysy Báıterek aýdany Mıchýrın aýyldyq okrýginde jastar keńesiniń jetekshisi. Zalına óz salasyndaǵy úzdik eriktilerdiń qataryna kiredi. Qazaq, sheshen, orys, arab jáne grýzın tilderin erkin meńgergen. Belsendi azamattyq ustanymy jáne úlken qoǵamdyq jumysy úshin kóptegen respýblıkalyq jáne halyqaralyq marapattarǵa ıe bolǵan.
Evgenııa Pavel
Evgenııa «Lider.kz» eriktiler qozǵalysynyń úılestirýshisi. Ol túrli qoǵamdyq jáne qaıyrymdylyq qorlarymen birge kópbalaly jáne az qamtylǵan otbasylarǵa, múgedekterge jáne ómirlik qıyn jaǵdaıǵa tap bolǵan adamdarǵa azyq-túlik kómegin kórsetedi. Búginde «Semeı Otbasy ortalyǵy» qoǵamdyq qorymen tyǵyz jumys isteıdi. Pandemııa kezinde belsendi azamattyq ustanymyn kórsetip, sýpermarketterde muqtaj jandarǵa arnalǵan mobıldi jetkizý jáne býyp-túıý toptaryn qurdy. Sonymen qatar, 1500-den astam otbasyn azyq-túlik taýarlarymen, zattarmen, otynmen jáne kómirmen qamtamasyz etýge kómektesti. Evgenııa túrli marapattar jáne medaldarmen, sondaı-aq Qazaqstan Respýblıkasynyń Prezıdenti Qasym-Jomart Toqaev taǵaıyndaǵan «Halyq alǵysy» medalimen marapattaldy.
Satıma Ahmetqalıeva
1990 jyldan Egindikól ortalyq kitaphana júıesin basqarady. Onyń basshylyǵymen uıym Aqmola oblysynda birneshe ret úzdik boldy. Adal eńbegi úshin kóptegen Qurmet gramotalarymen, «Kitaphana isiniń úzdigi» jáne «Kitaphana isiniń ardageri» belgilerimen marapattalǵan. Uzaq jyldar boıy Qazaqstan halqy Assambleıasynyń Aqmola fılıalynyń múshesi bolyp keledi.
Dına Syrǵabaeva
«Qareket Jaqsylyq Jasa» qoǵamdyq qorynyń negizin qalaýshy jáne jetekshisi. Áleýmettik kásipkerlik salasynda 20 jyldyq jumys tájirıbesi bar. Qyzmet etken jyldary taýarlar men qyzmetter óndirisin, sondaı-aq ótkizý naryǵyn jolǵa qoıdy. Pandemııa kezinde Qor qurǵan arnaıy top 3000 qolǵap taratty. Dına Syrǵabaeva men onyń seriktesteri elimizdiń ár óńirinen 1 000-nan astam muqtaj áıeldi jumyspen qamtamasyz etti. Sonymen qatar, olar «Tigin jáne aspazdyq sheberlik» onlaın-mektebin uıymdastyrdy. Synypta oqýshylar jartylaı fabrıkattar daıyndaýdy, kıim men toqyma tigýdi úırendi.
Buǵan deıin «Qazaqstannyń 100 jańa esimi» jobasynyń 4-inshi kezeńine ótinim qabyldaý bastalǵanyn jazǵan bolatynbyz.
Ótinimder 2021 jyldyń 22 aqpanynan 15 naýryzyna deıin 100janaesim.ruh.kz saıtynda qabyldanady.