«100 jańa esim» jobasyna kandıdattardy irikteý júrip jatyr

ASTANA. QazAqparat - «100 jańa esim» jobasyn júzege asyrý jáne kandıdattaryn irikteý jónindegi jumys tobynyń quramyna kiretin «Bolashaq» qaýymdastyǵynyń atqarýshy dırektory Azamat Bojakov óziniń aldaǵy tańdaýy týraly pikir bildirdi, dep habarlaıdy «QazAqparat» HAA tilshisi.

Qazirgi tańda ol «100 jańa esimniń» bolýy múmkin kandıdatynyń tek bireýin ǵana atady. «Bul - elimizdiń belgili bir salasynyń damýyna óziniń naqty úlesin qosqan adamdar. Eger ol dáriger bolsa, onda men kardıohırýrg Dmıtrıı Gorbýnovtyń esimin atar edim. Ol «Bolashaq» baǵdarlamasynyń túlegi, júrekke ota jasap, kóptegen adamdardyń ómirin saqtap qalǵan jan. Biraq ol týraly ázirge tek ózi jumys isteıtin aýrýhana ǵana biledi», - dedi Bojakov.

Bojakovtyń pikirinshe, júz qazaqstandyq tulǵanyń tizimine kiretin birneshe laıyqty kandıdat bar. Biraq ol olardyń esimderin atamady. 

«Bolashaq» baǵdarlamasy boıynsha jumys isteıtin ustaz bar. Onyń balalary olımpıadalarda birneshe ret júldeli oryndar aldy. Kóptegen ǵylymı maqalalardy, sonyń ishinde balamaly energetıka salasynda ǵylymı maqalalar jazǵan ǵalym da bar. Mundaı adamdardyń kópshilikke tanymal medıa-tulǵalar bolmaýy kerektigin atap ótkim keledi. Biz elimizge jańa esimderdi kórsetkimiz keledi», - dep túsindirdi ol.

Sondaı-aq, A. Bojakov atalmysh jobanyń Qazaqstannyń bolashaǵy úshin mańyzy zor ekendigin atap ótti.

«Bul joba arqyly biz óziniń kún saıynǵy eńbegimen izgi ister atqaryp jatqan biregeı tulǵalardy kórsetkimiz keledi. Jas urpaq úshin bul jaqsy úlgi jáne motıvatsııa bolýy kerek. Sebebi jastar olardan úlgi alyp, ózin-ózi kemeldendirýge umtylady», - dedi «Bolashaq» qaýymdastyǵynyń basshysy.