«100 jańa esim» jobasyna qandaı ózgerister endi

ALMATY. QazAqparat -«100 jańa esim» jobasyna úmitkerlerdi úkimettik emes uıymdar da usyna alady. Bul týraly Óńirlik kommýnıkatsııalar qyzmeti alańynda ótken baspasóz máslıhatynda aıtyldy, dep habarlaıdy QazAqparat tilshisi.

Atap ótilgendeı, atalmysh jobaǵa laıyqty azamattardy tabýǵa el aımaqtaryndaǵy kez kelgen úkimettik emes uıymdar atsalyspaq.

«Byltyr «100 jańa esim» jobasy óte sátti júzege asqandyǵyn bilemiz. Jastardyń arasynda myqty degen, alaıda tanylmaı júrgen azamattar kórindi. Aǵymdaǵy jyly - jobanyń ekinshi kezeńi. Bıylǵy jeńimpazdardy anyqtaý úshin birshama ózgerister engizildi. Eń negizi ózgeris «100 jańa esimdi» anyqtaýda basymdyq úkimettik emes uıymdarǵa berilmek. Bizder, úkimettik emes uıymdardyń ókili retinde bul tizimge azamattardy usyna alamyz. Ózimiz ol azamattar týraly nasıhattap, buqaraǵa tanytamyz», - dedi  «Jastar úni» jastar qoǵamdyq birlestiginiń tóraǵasy Dáýren Babamuratov.

Onyń aıtýynsha, úkimettik emes uıym ókilderi jańa «júzdikke» azamattardy usynyp qana qoımaı, olardyń jeńip shyǵýyna yqpal etpek.

«Engizilgen bul ózgeristi óte mańyzdy jáne ońtaıly sheshim dep esepteımin. Sebebi bıliktiń, halyqtyń moıyndaýyn qajet etip júrgen adamdardyń basym kópshiligi jumysbasty. Ol dáriger bolýy da múmkin, basqa salada qyzmet etýi múmkin. Sáıkesinshe halyqty ózine daýys berýge shaqyrýǵa qoly tımeıdi. Al biz - úkimettik emes uıym shynymen sondaı adamdardy taýyp,  saıt arqyly olarǵa daýys berýge barsha halyqty úndeı alamyz. Aldaǵy aptada Jastar qoǵamdyq birlestigi alǵashqy úmitkerlerimizdi usynamyz»,-dedi Dáýren Babamuratov.

Statıstıkalyq derekterge sáıkes búgingi kúni elimizde úkimettik emes uıymdardyń sany 20 myńǵa jetip otyr. Ádilet organdarynyń aqparaty boıynsha, Almaty qalasynda 5 863 ÚEU tirkelgen.