100 jańa esim: Jas ónertapqysh bıonıkalyq protez jasap jatyr

ALMATY. QazAqparat - «Qazaqstannyń 100 jańa esimi» qataryna kirgen Máýlen Bekturǵanovtyń MBionics startapy jasandy sananyń kómegimen bıonıkalyq protezderdiń mı arqyly baqylaý múmkindigin jasamaq, dep habarlaıdy QazAqparat.

MBionics startapy - elektrli mehanıkalyq protezderdi daıyndaý salasynda Qazaqstandaǵy alǵashqy kompanııa. Máýlen Bekturǵanovtyń startap ıdeıasy «Qazaqstannyń 100 jańa esimi» jobasynyń «Áleýmettik mańyzy bar joba» nomınatsııasynyń ǵylym salasy boıynsha kóshbasshy atanǵan edi. MBionics startapy - elektrli mehanıkalyq protezderdi daıyndaý salasynda Qazaqstandaǵy alǵashqy kompanııa. Máýlen Bekturǵanovtyń startap ıdeıasy «Qazaqstannyń 100 jańa esimi» jobasynyń «Áleýmettik mańyzy bar joba» nomınatsııasynyń ǵylym salasy boıynsha kóshbasshy atandy.

«Ártúrli jaǵdaıǵa baılanysty qolynan aıyrylǵan azamattarǵa biz ázirge bıonıkalyq protezdiń úsh túrin usynyp otyrmyz. Bolashaqta olardyń sanyn jeteýge jetkizý josparda bar. Ózderińizge belgili, bıonıkalyq protezder adam qolynyń bulshyqetterimen arnaıy sezgish apparattardyń kómegimen baılanysady. Olardyń sezgishtik deńgeıin úlkeıtý úshin jasandy sananyń múmkindikterin paıdalanýdamyz. Naqtyraq aıtsam, arnaıy baǵdarlamalanǵan jasandy sana tikeleı mı neırondarynyń sıgnaldaryn protezge jetkizý maqsatynda qoldanylady», - deıdi Máýlen Bekturǵanov.

Búginde Qazaqstanda qoly ampýtatsııalanǵan 14 myńnan  astam azamat ómir súredi. Olardyń nebári bir paıyzy ǵana zamanaýı bınonıkalyq protezdi qoldanady. Al qalǵandaryna bul ázirge qoljetimsiz bolyp otyr.

«Bıonıkalyq protezderdiń standarty túrleri bolmaıdy. Ol, ádette árbir adamnyń ampýtatsııalanǵan qolyna oraı arnaıy daıyndalady. Sondyqtan baǵasy da qymbat keledi. Shetelde biz jasap jatqan protezderdiń analogy 30 myń AQSh dollary kóleminde tursa, biz onyń baǵasyn 3 nemese 4 esege deıin qysqarta alamyz. Mysaly, 200 myń AQSh dollaryna 30 protez jasaımyz. Onyń ózi keıbir azamattar úshin aıtarlyqtaı qymbat bolýy múmkin. Osy sanattaǵy adamdar úshin arnaıy bank júıesiniń bólip tóleý ádisin engizýdi josparlap otyrmyz. Qarjy operatsııalaryn tolyǵymen kompanııanyń ózi júrgizedi, ıaǵnı bıonıkalyq protez aqysyn bólip tóleý kelisimine bank sektory aralaspaıdy», - deıdi jas ónertapqysh.

Aıte ketsek, Máýlen Bekturǵanov Almaty qalasynda O. Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka mektebinde bilim alǵan. Al bakalavr deńgeıin Halyqaralyq aqparattyq tehnologııalar ýnıversıtetinde «Esepteý tehnıkasy jáne baǵdarlamalyq qamtamasyz etý» mamandyǵy boıynsha alady. Qazir atalǵan ýnıversıtette joǵary bilimin jetildirip jatyr.

Avtor: Joldas Órisbaev