100 jańa esim: Jah Khalib uıymdastyrǵan mýzykalyq baıqaý jeńimpazy – Arystan Ábildın

NUR-SULTAN. QazAqparat – «Qazaqstannyń 100 jańa esimi» jobasynyń bıylǵy jeńimpazdarynyń arasynda jas mýzykant Arystan Ábildın de bar. 18 jastaǵy talant ıesi QazAqparat tilshisine óziniń shyǵarmashylyqtaǵy jetistikteri týraly aıtyp berdi.

Aıta keteıik, qaraǵandylyq Arystan Ábildın jazǵan kaver álemdik Shazam-ǵa ilikken bolatyn. Sonymen qatar, ol tanymal reper Jah Khalib uıymdastyrǵan mýzykalyq baıqaýdyń jeńimpazy.

«Men mýzykamen bala kezimnen aınalysamyn. Bes jasynan bastap fortepıano men barabanda oınaı bastadym. Ákem dereý mýzyka mektebine berdi. Ata-analarym da mýzykant. Sondyqtan ómirimdi shyǵarmashylyqpen baılanystyrý zańdylyq shyǵar dep oılaımyn. Alǵashqy avtorlyq ánimdi súıikti qyzyma arnaǵan bolatynmyn. Ony áleýmettik jeli qoldanýshylary joǵary baǵalap, mýzykamen túbegeıli aınlysýyma jiger berdi. Bul meni jańa shedevrler jasaýǵa shabyttandyrdy», - dedi jas mýzykant.

Qazir Arystan Ábildın mýzyka salasyndaǵy tanymal otandyq kompanııamen kelisimshart aıasynda jumys istep júr.

«Jaqynda áriptestik kelisimshart jasastyq. Men osyndaı erekshe múmkindik alǵanyma óte qýanyshtymyn. Bizdiń kompanııa áriptestik ornatqan reseılik birlestik Ivan Dorn, Zıvert, Fılıp Kırkorov sııaqty tanymal oryndaýshylarmen jumys isteıdi. Osy múmkindikti paıdalanyp kóptegen jańa hıtter shyǵaramyz dep úmittenemin», - deıdi mýzykant.

Áńgime barysynda ol Jah Khalib uıymdastyrǵan mýzykalyq baıqaýdaǵy jeńisine toqtaldy.

«Shynymdy aıtsam, men jeńemin dep oılaǵan joq edim. Daýys berý qorytyndysy boıynsha eń kóp ball jınappyn. Osylaısha avtorlyq konkýrsta jeńiske jettim», - deıdi Arystan.

Onyń armany – álemdik sahnalarda án salyp, shyǵarmashylyq ıesine aınalý.

«Men «100 jańa esim jobasynda» jeńimpazdardyń arasynda bolǵanyma óte qýanyshtymyn. Bul men úshin jańa qadam. Árıne, bul meniń jeke damýyma áser etedi jáne jańa shyǵarmashylyq shyńdardy baǵyndyrýǵa yqpal etedi», - dep aǵynan jaryldy Arystan Ábildın.