«100 Sarbaz» – Jibek Joly arnasynda jańa joba
«100 Sarbaz» - qazaq televızııasyndaǵy ásker salasyna arnalǵan alǵashqy aýqymdy biregeı joba. Baǵdarlama júrgizýshisi - belgili kıno jáne teatr akteri Berik Aıtjanov.
«100 Sarbaz» áskerı-patrıottyq realıtı jobanyń atqarýshy prodıýseri ári qoıýshy-rejısseri Aıgúl Aqsambıevanyń sózinshe, túsirilim búgin bastaldy.
«Túsirilim bastaldy. Jobanyń maqsaty – jaýyngerlerdiń adamı portretin kórsetý. Áskerı qyzmetkerlerdiń eń jaqsy qasıetterin – batyldyǵyn, jigeri men erjúrektiligin pash etý.100 Sarbaz - namys jobasy. Oǵan áýe qorǵanysy kúshteri, qurlyq áskerleri, Ulttyq ulan sııaqty on komanda qatysady. Medııa naryǵy úshin erekshe joba. Aýqymdy realıtı jobalarǵa telearnalar kóp bara bermeıdi»,- dedi ol.
Joba barysynda qatysýshylar ózderiniń tek bilek kúshin ǵana emes, eń qıyn synaqtarǵa tótep bere alatyn, maqsatqa jetkizetin rýhanı kúshin kórsete bilýi kerek.
«Bul jerge ózimizdi synap kórý úshin keldik. Aramyzda álem chempıony atanǵan, 500 shaqyrym júgirgen jigitter bar. Bizdi aldymyzda qandaı synaq kútip turǵanyn bilmeımiz. Áskerı qyzmetshi bolǵandyqtan, bárine daıynbyz. Kez-kelgen qıyndyqqa tótep beremiz»,- deıdi Armııa ortalyq sport klýby komandasynyń kapıtany Jomart Aıýpov.
Qarqyndy kúres, kóshbasshy bolýǵa umtylys, tán men rýhtyń múmkindikteri – munyń bári árbir kórermenge jarqyn da, umytylmas emotsııa syılary haq.
Aıgúl Aqsambıevanyń aıtýynsha, «100 Sarbaz» áskerı- patrıottyq realıtı joba efırge jeltoqsan aıynda shyǵady. Efır ýaqytynyń uzaqtyǵy 60 mınýt.