100 oqýlyq: Qazaq tiliniń ǵylymı qory halyqaralyq leksıkamen baıytylady - Shyryn Qurmanbaeva
Shyryn Asylhanqyzynyń sózinshe, jastarǵa qoljetimdi qazirgi zamanǵy bilim qajet. Sondyqtan bul bastama jastardy jańa joǵary dárejege kóterýge, jáne jalpy jastardyń básekege qabilettiligin arttyrady.
«100 jańa oqýlyq» bastamasyn tolyǵymen qoldaımyn. Bul óte quptarlyq is. Atalmysh kontseptsııa qazaqstandyq gýmanıtarlyq bilimdi damytýǵa úlesin qosatyn bolady. Jańa kózqarastar men ǵylymı túsinikterdiń qazaq ǵylymy men tiliniń aınalymyna enýi keleshekte qubylystyq jańǵyrý týdyrady dep senemiz. Maqalada «Biz tarıh, saıasattaný, áleýmettaný, fılosofııa, psıhologııa, mádenıettaný jáne fılologııa ǵylymdary boıynsha stýdentterge tolyqqandy bilim berýge qajetti barlyq jaǵdaıdy jasaýǵa tıispiz. Atalǵan pánder joǵary oqý oryndary baǵdarlamalarynan alynyp tastalynǵan. Gýmanıtarlyq bilim stýdentterdiń ǵylymı dúnıetanymyn, qundylyq baǵdaryn jáne ómirlik pozıtsııasyn aıqyndaıdy. Sondyqtan, atalmysh jobany praktıkalyq turǵyda júzege asyrý úshin bul pánderdi joǵary oqý oryndarynyń oqý baǵdarlamalaryna qaıta engizý usynylady», - dedi Shyryn Qurmanbaeva.
Saıasat ǵylymdarynyń doktory 18 oqýlyqtyń aýdarylǵanyn jaqsy kórsetkish dep baǵalady.
«Qundy aqparatty qazaq tilinde ala alatynymyz - professorlyq-oqytýshylyq quram jáne stýdentter úshin mańyzdy máselelerdiń biri. Kúndelikti dáriske, ǵylymı sharalarǵa daıyndyq barysynda qazaq tilindegi materıaldar tapshylyǵyna ushyrap jatatynymyz da bar. 100 oqýlyq aýdarý nátıjesinde ǵylymı kontent qory kóbeıip, qazaq tiliniń ǵylymı qory halyqaralyq ǵylymı leksıkamen baıytylady. Bul tildiń damýyna septigin tıgizedi. Joǵary oqý oryndaryndaǵy bilimniń mazmuny álemdik deńgeıge kóterilýge múmkindik alady. Álemniń úzdik oqýlyqtaryn qazaq tiline aýdarý stýdentterdiń bilim deńgeıin arttyryp, jeke adam jáne maman retinde tabysqa jetýine jol ashady», - dedi Shyryn Qurmanbaeva.