«100 oqýlyq»: Qaraǵandy kolledjderine qazaq tiline aýdarylǵan kitaptar jetti

QARAǴANDY. QazAqparat - Qaraǵandy kolledjderine «Qazaq tilindegi 100 jańa oqýlyq» respýblıkalyq jobasy aıasynda aýdarylǵan kitaptar jetkizildi, dep habarlaıdy QazAqparat «Habar 24» telearnasyna silteme jasap.

«Bolashaqta jastarymyz sheteldik azamattardan qalys qalmaýy, 30 alpaýyt memlekettiń qasynan tabylýy eń birinshiden, osy gýmanıtarlyq salaǵa baılanysty. Garvard, Stenford, Oksford sııaqty oqý oryndary osy kitaptarmen dáris berip jatyr. Biz osy kitaptardy joǵary synyp oqýshylary men kolledj stýdentterine jetkizýdi jón sanadyq», - dedi oblystyq bilim basqarmasynyń basshysy Esenǵazy Imanǵalıev.

Bilim salasy mamandarynyń aıtýynsha, «100 jańa oqýlyq» jobasy ǵylymı mazmun men qazaq tiliniń leksıkasyn baıytýǵa, ǵylymı termınologııany odan ári damytýǵa serpin beredi. Sondaı-aq jastardyń álemniń úzdik standarttarymen bilim alýyna jol ashady. Budan bólek, joba aıasynda jetekshi halyqaralyq ýnıversıtetter, ǵylymı ortalyqtar men oqýlyqtar shyǵarýǵa mamandanǵan baspalarmen tyǵyz yntymaqtastyq ornatylýda.  
 

Eske salaıyq, «Jańa gýmanıtarlyq bilim. Qazaq tilindegi 100 jańa oqýlyq» - Elbasynyń «Bolashaqqa baǵdar: rýxanı jańǵyrý» baǵdarlamalyq maqalasynda jarııalanǵan jobalardyń biri. Bıylǵy sáýir aıynda alǵashqy 18 oqýlyq aýdarylyp, Prezıdentke tanystyryldy.

Olar: Derek Djonstonnyń «Fılosofııanyń qysqasha tarıhy. Sokrattan Derrıdaǵa deıin»; Entonı Kennıdiń «Batys fılosofııasynyń jańa tarıhy. Antıka fılosofııasy» І-tomy jáne «Batys fılosofııasynyń jańa tarıhy. Orta ǵasyr fılosofııasy» ІІ-tomy; Remı Hesstiń «Fılosofııanyń tańdaýly 25 kitaby»; Devıd Brınkerhof, Roýz Ýeıts, Sıýzan Orteganyń «Áleýmettaný negizderi»; Djordj Rıttser, Djeffrı Stepnıtskıdiń «Áleýmettaný teorııasy»; Ellıot Aronsonnyń «Kópke umtylǵan jalǵyz. Áleýmettik psıhologııaǵa kirispe»; Dýeın Shýlts, Sıdneı Ellen Shýltstiń «Qazirgi psıhologııa tarıhy»; Devıd G. Maıers, Jan M. Týenjdiń «Áleýmettik psıhologııa»; N. Gregorı Menkıý, Mark P. Teılordyń «Ekonomıks»; Donald F. Kýratkonyń «Kásipkerlik: teorııa, protsess, praktıka»; Rıkkı Ý. Grıffınniń «Menedjment»; Karen Armstrongtyń «Iýdaızm, hrıstıandyq pen ıslamdaǵy 4000 jyldyq izdenis: Qudaıtaný baıany»; Vıktorııa Fromkın, Robert Rodman, Nına Haıamstyń «Til bilimine kirispe»; Svetlana Ter-Mınasovanyń «Til jáne mádenıetaralyq kommýnıkatsııa»; Alan Barnardtyń «Antropologııa tarıhy men teorııasy»; Klaýs Shvabtyń «Tórtinshi ındýstrııalyq revolıýtsııasy».

Oqýlyqtardyń tizimi men joba týraly tolyq aqparatty www.100kitap.kz saıtynan alýǵa bolady.