«100 oqýlyq» el ıgiligi jolyndaǵy biregeı joba - saıası ǵylymdar kandıdaty Nasymov

QYZYLORDA. QazAqparat - «Qazaq tilindegi 100 jańa oqýlyq» jobasy búgingi býynnyń oıtanymyn keńeıtip, irgeli isterdiń ilgeri basýyna óz septigin tıgizedi. Qyzylorda qalasyndaǵy «Bolashaq» ýnıversıteti janyndaǵy ǵylymı-zertteý ınstıtýtynyń dırektory, saıası ǵylymdar kandıdaty Murat Nasymov osylaı málim etti, dep habarlaıdy QazAqparat tilshisi. 

Onyń aıtýynsha, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda júzege asyrylyp jatqan «Jańa gýmanıtarlyq bilim. Qazaq tilindegi 100 jańa oqýlyq» jobasy jastar úshin kemel keleshekke negiz qalaǵan oń bastama dep sanaýǵa tolyq negiz bar.

«Álemniń búgingi demine úńilip kórsek, bilimdi myńdy jyǵatyn kezeńniń kelgenin aıqyn ańǵartyp otyr. Qaı salany alyp qarasańyz da, osyndaı tynys-tirshilik talabyn túsinýge bolady. Bizdiń Qazaqstan memleketi táýelsizdiktiń alǵashqy jyldarynan bastap dúnıejúzindegi ozyq elderdiń qataryna qosylýǵa barynsha kúsh salyp keledi. Búgingi tańda bul baǵytta qol jetken tabystarymyz kóp. Bul oraıda ǵylym salasynyń alatyn orny aıryqsha», - deıdi Murat Nasymov.

Onyń aıtýynsha, júıeli bilim alýǵa negiz bolatyn jańa oqýlyqtar - «Rýhanı jańǵyrý» baǵdarlamasyndaǵy búgingi býyn ókilderiniń bolashaǵy úshin qolǵa alynǵan biregeı joba.

«Alqaly jıyn barysynda Elbasy mundaı keshendi baǵdarlamanyń júzege asýy álem elderinde sırek kezdesetinine nazar aýdardy. Bolashaǵynyń baıandy bolýyn maqsat tutqan Qazaqstan osy baǵytta oraıly isti qolǵa alyp otyr. Aıta keterligi, búginde halyq tarapynan qyzý qoldaý tapqan «Rýhanı jańǵyrý» baǵdarlamasy - búgingi býyn ókilderiniń bolashaǵy úshin qolǵa alynǵan biregeı joba. Ulan-ǵaıyr atyrapta oryn tepken Uly Dala elinde urpaǵymyz ulyq tutar qasterli oryndar, tarıhı mekender, eńseli eskertkishter bar. Qanshama dáýirlerdiń izi qalǵan baıtaq dalamyzdyń uly qasıetterin sezinip ósken búgingi urpaq endi sol týǵan eldiń týyn bıikte ustaý jolynda tynymsyz ter tógýi tıis»,  - deıdi Murat Nasymov.

Ádilet QAŃTARBAEV