«100 oqýlyq»: Aýdarylǵan kitaptarǵa qandaı talaptar qoıyldy

ASTANA. QazAqparat - Qazaq tiline aýdarylǵan 18 oqýlyqtyń jalpy taralymy 47 mıllıonnan asady. Bul týraly Ulttyq aýdarma bıýrosynyń atqarýshy dırektory Raýan Kenjehanuly aıtty, dep habarlaıdy QazAqparat tilshisi.

«Ózińizdiń tapsyrmańyz boıynsha osy mindetti iske asyrý úshin úkimettik emes jáne kommertsııalyq emes negizde jumys isteıtin Ulttyq aýdarma  bıýrosy quryldy. Búgin  osy asa jaýapty ári ózindik qıyndyqtary da kóp jumystyń alǵashqy nátıjesimen tanystyrýdyń sáti keldi», - dep atap ótti ol búgin «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda jaryq kórgen oqýlyqtardy Elbasy Nursultan Nazarbaevqa tanystyrý barysynda.

Onyń aıtýynsha, «100 oqýlyq» jobasy jarııalana salysymen elimizdiń joǵary oqý oryndarynan aýdarýǵa usynylǵan barlyǵy 800-den asa oqýlyq kelip tústi.

«Mamandardan qurylǵan arnaıy jumys toby aýdarylatyn oqýlyqtarǵa qoıylatyn mynadaı talaptardy anyqtady: oqýlyq dúnıejúzindegi mańdaıaldy 100 ýnıversıtettiń baǵdarlamasynda bolýy kerek; keminde úsh ret basylyp shyǵýy tıis; mazmuny ózekti ári ıdeıalyq turǵydan beıtarap bolýy kerek; sonymen birge oqýlyq zaman talabyna saı ınteraktıvti oqyp-úırenýge múmkindik berýi qajet», - dedi Raýan Kenjehanuly.
  

Ulttyq bıýro dırektorynyń  atap ótýinshe, osyndaı talaptar negizinde fılosofııa,  áleýmettaný, psıhologııa, til bilimi, antropologııa men  dintaný, jýrnalıstıka, ekonomıka men kásipkerlik salalaryn qamtıtyn alǵashqy 18 oqýlyq iriktelgen.

«Tańdalǵan oqýlyqtardy jınaqtap aıtsaq, bul oqýlyqtar álemniń 42 elinde 34 tilde basylyp, jalpy taralymy 47 mıllıonnan asqan. Mundaı oqýlyqtarda memlekettik baǵdarlama aıasynda aýdaryp, tegin taratý álemde balamasy joq tájirıbe», - dedi ol.
 

Aıta keteıik, Astanadaǵy Nazarbaev ortalyǵynda «Qazaq tilindegi 100 jańa oqýlyq» jobasy aıasynda aýdarylǵan alǵashqy kitaptardyń tanystyrylymy ótip jatyr.  Saltanatty sharaǵa QR Prezıdenti Nursultan Nazarbaev qatysýda.