«100 naqty qadam»: Zań ústemdigin qamtamasyz etý sybaılas jemqorlyqty joıýǵa septigin tıgizedi

ASTANA. QazAqparat - Elbasynyń bes ınstıtýtsıonaldyq reformasynda aıqyndalǵanyndaı, zań ústemdigin qamtamasyz etý adamnyń irgeli quqyǵy men bostandyǵyn tolyq qamtamasyz etýge, sybaılas jemqorlyqty tamyrymen joıýǵa, qoǵamdyq tártip pen qaýipsizdiktiń saltanat qurýyna, memlekettik bılikti shekteýge, ádilsot bıliginiń qalyptasýyna septigin tıgizetin bolady. Bul týraly búgin Ortalyq kommýnıkatsııalar qyzmetinde ótken brıfıngte «Eýrazııalyq quqyq qorǵaý ortalyǵy» úkimettik emes uıymynyń ókili Ermek Abrasýlov osylaı málim etti.

Sarapshynyń aıtýynsha, qazaqstandyq zańnamanyń Konstıtýtsııaǵa meılinshe sáıkes bola túsýi mańyzdy.

«Bul rette bizde jaqsy tetikter barshylyq. Ata zańdy quqyqtyq qorǵaý sýbektisi retinde Konstıtýtsııalyq keńes, sot organdary men basqa da qurylymdary jumys isteıdi. Degenmen, zań aktileriniń kóptigi zańnamalardaǵy qaıshylyqty týdyratyn problemaǵa aınalýy múmkin», - dedi brıfıng barysynda E.Abrasýlov.

Onyń sózine qaraǵanda, zań ústemdigi doktrınasy sot júıesin jańa deńgeıge jetkizýge septigin tıgizetin bolady. Osy turǵydan alǵanda «Eýrazııalyq quqyq qorǵaý ortalyǵy» ÚEU sarapshylary Prezıdent Nursultan Nazarbaevtyń sot ınstantsııalaryn bes satydan úsh satyǵa deıin qysqartý týraly ustanymyn óte durys dep sanaıdy.

«Bul zańdardyń birizdiligin qamtamasyz etetin shara. Al budan keıingi másele - zańdardyń birkelki oryndalýy. Bul rette sot tájirıbelerin jalpylandyrý, sot aktilerine monıtorıng júrgizý qajet. Osynyń arqasynda problemalar aıqyndalyp, zańnyń birkelkiligi qamtamasyz etilmek», - dedi E.Abrasýlov.