«100 naqty qadam» Ult josparynyń tórtinshi baǵyty boıynsha 33 normatıvtik akti qabyldandy - E. Toǵjanov

ASTANA. QazAqparat - «100 naqty qadam» Ult josparynyń tórtinshi baǵyty boıynsha 33 normatıvtik akti qabyldandy. Bul týraly búgin Ortalyq kommýnıkatsııalar qyzmetinde ótken baspasóz máslıxatynda Qazaqstan xalqy Assambleıasy Tóraǵasynyń orynbasary Eraly Toǵjanov málim etti.

Onyń sózi boıynsha, «100 naqty qadam» Ult josparynyń tórtinshi baǵyty aıasynda qazirgi tańda 5 pýnkt júzege asyrylý kezeńinde.

2015 jyldyń sońynda Qazaqstan Prezıdenti N.Á.Nazarbaev «Máńgilik El» jalpyulttyq patrıottyq ıdeıasynyń qundylyqtary negizinde qazaqstandyq birtektilik pen birlikti nyǵaıtý jáne damytý Tujyrymdamasyn bekitti. Qoǵamdyq sanany qaıta qalyptastyrý jáne búkilqazaqstandyq mádenıetti nyǵaıtý turǵysynan jetekshi ról Qazaqstan halqy Assambleıasyna beriledi.

«Ult Jospary» «100 naqty qadam» aıasynda birlik pen birtektilikti qalyptastyrý maqsattary qoıylǵan. Ol maqsat birneshe baǵyt boıynsha damytylady. Búginde osy baǵytta 33 normatıvtik akt qabyldandy. QR Parlament deńgeıinde 5 iri zańǵa qol qoıyldy. Memleket Basshysynyń 5 Jarlyǵy men Úkimettiń 12 Qaýlysy qabyldandy jáne búginde júzege asyrylýda», - dep atap ótti E. Toǵjanov.

«Bul reformalar Qazaqstan xalqy Assambleıasy negizinde iske asady. Sebebi, eldiń birligi árqashanda táýelsizdiktiń tiregi bolyp qala beredi. Ol - el damýynyń negizgi qundylyqtarynyń biri. Eger 30 damyǵan eldiń qataryna enýge talpynatyn bolsaq, elimizdiń týyn joǵary kóterip, ekonomıkalyq-áleýmettik suraǵyn da sheshemiz deıtin bolsaq, aldymen qoǵamdyq kelisimdi, elimizdiń turaqty damýyn tikeleı qamtamasyz etýimiz kerek»,-dedi ol.