«100 naqty qadam» ult jospary men 5 ınstıtýttyq reformany iske asyrýda «Bolashaq» stıpendııasynyń mańyzy zor - G.Ábdiqalyqova
Bul pikirdi búgin Aqordada ótken Shetelde kadrlar daıarlaý jónindegi respýblıkalyq komıssııasynyń kezekti otyrysynda QR Memlekettik hatshysy Gúlshara Ábdiqalyqova aıtty.
«Elbasy usynǵan «100 naqty qadam» ult jospary men 5 ınstıtýttyq reformany iske asyrýda «Bolashaq» stıpendııasynyń mańyzy zor. Óıtkeni alǵa qoıǵan mindetterdi sapaly oryndaýda birinshi kezekte álemniń úzdik joǵary oqý oryndaryn bitirgen joǵary bilikti mamandar qajet. Ózderińiz bilesizder, 18 naýryzda ótken komıssııa otyrysynda múddeli memlekettik organdarǵa birneshe tapsyrma berdik. Birinshi, 2016-2020 jyldarǵa arnalǵan jańa jospardy jasaý. Ekinshi, PhD jobasyn iske asyrý boıynsha tujyrymdama jasaý. Úshinshi, 2014 jylǵy taǵlymdama boıynsha jáne 2015 jylǵa magıstranttar men tájirıbeden ótýdi belgileý», - dedi otyrysty ashqan Memlekettik hatshy.
Otyrys barysynda Bilim jáne ǵylym mınıstri Aslan Sárinjipov «Bolashaq» halyqaralyq stıpendııasynyń 2016-2020 jyldarǵa arnalǵan damý josparynyń jobasyn usyndy. Komıssııa músheleri «Bolashaq» baǵdarlamasy boıynsha Split PhD iske asyrý tujyrymdasyn maquldady. Tujyrymdama Qazaqstannyń Indýstrııalyq-ınnovatsııalyq damý memlekettik baǵdarlamasy aıasynda eldegi joǵary oqý oryndarynda ǵylymı kadrlar daıarlaýdyń jańa júıesin engizýdi kózdeıdi.
Sonymen qatar otyrysta aldyn ala konkýrstyq irikteýden ótken úmitkerlerge «Bolashaq» halyqaralyq stıpendııasyn taǵaıyndaý máselesi qaraldy.
Qorytyndysynda QR Memlekettik hatshysy G.Ábdiqalyqova Shetelde kadrlar daıarlaý jónindegi respýblıkalyq komıssııanyń jumysyn odan ári uıymdastyrý aıasynda birqatar tapsyrma berdi.