«100 naqty qadam» elimizdiń jahandyq jáne ishki syn-qaterlerge basty jaýaby bolady - QR Premer-Mınıstri

ASTANA. QazAqparat - Memlekettegi budan ary qaraı reformalar boıynsha «100 naqty qadam» - Ult josparyn júzege asyrý elimizdiń jahandyq jáne ishki syn-qaterlerge bizdiń basty jaýabymyz bolady. Bul týraly búgin Astanadaǵy Ortalyq jáne Ońtústik Azııa elderindegi zorlyq-zombylyq ekstremızmge qarsy is-qımyl jónindegi óńirlik konferentsııada QR Premer-Mınıstri Kárim Másimov málim etti.

«Kóbinese osy jaǵymsyz qubylystarǵa nashar áleýmettik jáne ekonomıkalyq orta ıtermelep otyrady. Kóptegen memleketter qazirgi zamanǵy syn-qaterlerdiń synynan ótýdiń kúrdeli kezeńin eńserýde. Osy oraıda Memleket basshymyz 100 naqty qadamnan turatyn jańa Ult josparyn usyndy. Bul óz kezeginde budan ary qaraıǵy reformalarǵa negizdelgen. Osy qadamdardy júzege asyrý jahandyq jáne ishki syn-qaterlerge jaýap bolady», - dedi Premer-Mınıstr.

K.Másimov álemdegi oqıǵalar zorlyq-zombylyqty ekstremızm qaýiptiń basty kózine aınalǵanyn kórsetip otyrǵandyǵyn, osy oraıda tyǵyz yntymaqtastyq qajettilik etetindigin atap ótti.

Úkimet basshysy búginde Qazaqstan ekstremızmniń barlyq qubylystaryna qarsy tıisti sharalardy qabyldap jatqandyǵyna toqtala kele, qazirgi tańda elimiz osy baǵytta túrli halyqaralyq uıymdar aıasynda lańkestikke qarsy qurylymdarmen belsendi jumystar júrgizip jatqandyǵyn jetkizdi.