«100 mektep, 100 aýrýhana» baǵdarlamasyna sáıkes 2010 jyly 45 nysan paıdalanýǵa beriledi

ASTANA. Qańtardyń 2-si. QazAqparat /Marlan Jıembaı/ - QR Úkimetiniń josparyna sáıkes 2010 jyly «100 mektep, 100 aýrýhana» baǵdarlamasy boıynsha 45, al 2011 jyly - 8, 2012 jyly 34 nysannyń qurylys aıaqtalady.

2009 jyly 87 mekteptiń qurylysy aıaqtalǵan bolatyn, onyń 39-y atalǵan baǵdarlama boıynsha salynsa, 48-i baǵdarlamadan tys iske qosylyp otyr. Jalpy «100 mektep, 100 aýrýhana» baǵdarlamasy boıynsha 2007-2009 jyldar kezeńinde 85 bilim ordasy paıdalanýǵa berildi.

Al osy baǵdarlama boıynsha ótken jyly qurylysy aıaqtalǵan aýrýhana nysandarynyń sany 10-ǵa jetip otyr. Sonymen qatar 2007-2009 jyldar kezeńinde baǵdarlamadan tys 201 nysan salynǵan, onyń ishinde respýblıkalyq bıýdjet esebinen 32 aýrýhana, jergilikti bıýdjettiń qarjylandyrýymen 6 aýrýhana boı kóterip, ınvestorlardyń esebinen 1 qan ortalyǵy paıdalanýǵa berilgen. Sondaı-aq 97 feldsherlik-akýsherlik beket pen 51 dárigerlik emhana tolyq salynyp bitip, 8 dárigerlik emhananyń 6-ýy jergilikti bıýdjetten, al 2-ýi ınvestorlardyń esebinen irge kótergen.