«100 qadam» Ult josparynyń minsiz oryndalýy qabyldanatyn zań sapalaryna tikeleı baılanysty - Q. Toqaev
Búgin Senattyń tórtinshi sessııa barysyndaǵy jumysyn qysqasha qorytyndylaǵan palata spıkeri Qasym-Jomart Toqaev osylaı málimdedi.
Sóz arasynda spıker Senattyń zań shyǵarmashylyq qyzmetine nazar aýdara kele, sessııa aıaqtalǵanymen depýtattar jumysy jalǵasa beretinin atap ótti. «Barshalaryńyz Memleket basshysy jarııalaǵan bes ınstıtýtsıonaldyq reforma aıasynda qarastyrylǵan «100 naqty qadam» Ult josparyna qatysty aýqymdy sharalar týraly jan-jaqty bilesizder. Qoǵamdyq qatynastar júıesin tolyqtaı jańǵyrtýdy qamtıtyn reformalar «Nurly Jol-bolashaqqa bastar jol» Jańa ekonomıkalyq saıasatymen jáne ındýstrııalyq-ınnovatsııalyq damýdyń memlekettik baǵdarlamasymen tikeleı baılanysty. Sonymen qatar, Qazaqstannyń Dúnıejúzilik saýda uıymyna kirýi elimizdegi tıisti quqyqtyq bazany júıeli túrde jańalaýdy talap etedi», - dedi Senat spıkeri Qasym-Jomart Toqaev.
Osyǵan baılanysty Palata Tóraǵasy Parlamenttiń aldaǵy kúzgi sessııasynda aýqymdy jumystar kútiletinin, tereń zerdelep jedel qabyldaýǵa tıisti qujattar toptamasy kelip túsetinine nazar burdy.
«Erekshe atap óterlik jaıt, ultty jańǵyrtýǵa negizdelgen Elbasy josparlarynyń minsiz oryndalýy qabyldanatyn zańdardyń sapasyna tikeleı baılanysty. Osyǵan oraı, bizdi alda aýqymdy jumystar kútip tur. Sondyqtan da bizdiń árqaısysymyz Memleket basshysy júktegen jaýapkershilikti tereń sezinip, bar kúsh-jigerimizdi sala jumys isteýge tıispiz», - dedi Q. Toqaev.