«100 qadam» Ult jospary aıasynda Jer qoınaýyn paıdalaný kodeksine ózgerister engiziledi - U. Qarabalın

ASTANA. QazAqparat - Bul týraly búgin Ortalyq kommýnıkatsııalar qyzmetinde ótken brıfıng barysynda Energetıka birinshi vıtse-mınıstri Uzaqbaı Qarabalın málim etti. Brıfıng Elbasy aıqyndaǵan «100 qadam» Ult jospary aıasynda jer qoınaýyn paıdalaný salasyndaǵy ilgeri reformalar taqyrybynda ótken bolatyn.

«Elbasy aıqyndaǵan reformalar arqasynda jer qoınaýyn paıdalaný, onyń ishinde qatty paıdaly qazbalar, kómirsýtek shıkizattary boıynsha Qazaqstanda buqaralyq eseptiliktiń halyqaralyq standarty júzege asady. Mıneraldyq shıkizattyq keshen salasynda ınvestıtsııalyq tartymdylyq arta túsedi. Paıdaly qazbalar eseptiligi, salyq salý bazasynyń saqtalýy men jumys oryndarynyń saqtalýy jáne jer qoınaýyn paıdalaný boıynsha memleket pen múddeli tarap arasyndaǵy basymdyqtardyń saqtalýy qamtamasyz etiledi», - dedi U. Qarabalın.

Onyń aıtýynsha, reformalardy tolyq júzege asyrý úshin zańnamalyq qamtýlar jáne tıisti normatıvtik-quqyqtyq aktiler, sonymen qatar reformalardy qarjylyq turǵydan qamtamasyz etý qajet bolyp tabylady. «Sonyń ishinde 2016 jyldyń sońyna deıin Jer qoınaýy jáne jer qoınaýyn paıdalaný kodeksine tolyqtyrýlar men ózgerister engizilip, Parlamentke usynylady. Budan bólek, 2017 jyldyń aıaǵyna deıin ken oryndaryn baǵalaý protsesin retteıtin normatıvtik-quqyqtyq akitilerge tolyqtyrýlar men ózgerister engizý josparlanady. Osyndaı daıyndyq jumystarynan soń, 2018 jyldan bastap halyqaralyq standarttarǵa kóshetin bolamyz», - dedi vıtse-mınıstr.