100 esek baqqan Shymkent turǵyny ony soıyp, etin Qytaıǵa ótkizbek bolǵan
Áleýmettik jelide esekterdi belgilenbegen orynda soıyp jatyr degen vıdeo tarady. Avtordyń aıtýynsha, beınejazba Shymkenttegi Qursaı shaǵynaýdanynda túsirilgen.
«Bunyń bári nege júr? Mine, olarǵa jýyndy beredi. Toıhanadan ba, bir jaqtan alyp keledi-aý shamasy. Ony soıǵan, dálel retinde myna shuńqyrda esektiń sıraqtary, ishek-qarny jatyr. Aýrý qaıdan taraıdy? Árıne, osy jerden... Veterınarııalyq ınspektsııa mamandaryn, polıtsııany shaqyrdyq»,-deıdi vıdeo avtory.
Atalǵan beınejazbany Veterınarııalyq baqylaý jáne qadaǵalaý komıtetiniń qalalyq ınspektsııasyndaǵylar dereý nazarǵa alǵan. Oqıǵa 12 mamyrda bolǵan.
Kásip ıesiniń mamandarǵa bergen jaýabyna sáıkes, ol bul jerde 104 bas esek pen 36 usaq mal ustaǵan.
«Júrgizilgen tekserý jumysyna sáıkes kásipker 4 esekti belgilenbegen orynda soıǵany anyqtaldy. Al onyń etin tońazytqyshta saqtaǵan. Bizge bergen jaýabynda ol mal etin jınap, Qytaı eline eksporttamaq bolǵanyn aıtty. Soıylǵan ettiń barlyǵyn biz aldyq, ony joıý jumystary júrip jatyr. Bizdiń zańnamada esek asyraýǵa tyıym salynbaǵan. Biraq ony arnaıy bekitilgen orynda soıý kerek. Bul talapty oryndamaǵany úshin (Ákimshilik quqyq buzý týraly kodekstiń 406-baby) kásip ıesine aıyppul salyndy»,-dedi Shymkent qalalyq veterınarııalyq baqylaý ınspektsııasynyń bólim basshysy Syrym Qarabekov.
Al qala turǵynyna Ákimshilik quqyq buzý týraly kodekstiń 505-babymen hattama toltyrylǵan.