10 jyldaı toqtap turǵan Aqsý qant zaýytynda jóndeý jumystary bastaldy

TALDYQORǴAN. QazAqparat - Almaty oblysynyń əkimi Amandyq Batalov Aqsý aýdanyna jumys saparymen baryp, Aqsý qant zaýytyn iske qosýǵa daıyndyq jumystarynyń barysymen tanysyp qaıtty, dep habarlaıdy QazAqparat tilshisi.

Nysan alǵash ashylǵan 1968 jyldan beri kásiporynnyń kánigi mamanyna aınalǵan bas ınjener Vladımır ıÝjkovtyń aıtýynsha, tot basyp tozǵan, ári eskirgen jylytý qazandyqtaryn, qubyrlar men barabanyn aýystyrý qajet. Al qajetke jaraıtyn quraldar tek jóndeýden ótkiziledi. Bul baǵyttaǵy zerdeleý jumystaryn arnaıy mamandar bastap ta ketken.

Jalpy zaýytty iske qosýdyń birinshi kezegine 8 mlrd teńge qajet bolsa, sonyń 2,7 mlrd teńgesin oblys «Jetisý» ÁKK arqyly bólmek, al qalǵan 6 mlrd teńge ınvestıtsııany «Energomost» konsortsıýmy ózi quıady. Birinshi kezekte zaýyttyń búginge deıin bútindeı saqtalyp kelgen barlyq qural-jabdyqtary zerdeleýden ótkizilip, qajetine qaraı jóndelip, aýystyrylady.

Oblys basshysy osy oraıda zaýyttyń myqty mamandaryna arnap 20 páterli úı salýdy usynyp, onyń tıisti qujattaryn ázirlep, kúzde qurylysyn bastaýdy aýdan ákimi Á. Dalbaǵaevqa tapsyrdy.

Zaýyt ınvestorlaryna kásiporynda erteden eńbek etip kele jatqan bilikti mamandarmen keńese otyryp jumys isteýge keńes berdi. Sondaı-aq óńirdegi sharýa qojalyqtarymen kelisimshartqa otyryp, ónim qabyldaý kestesin de ázirlep qoıý qajettigin aıtty. Zaýyttyń shıkizat alǵany úshin sharýalarǵa tóleıtin qarajaty, ıaǵnı ózinde artyq qory bolýy kerektigin de tilge tıek etti.

«Memleket basshysynyń tapsyrmasyna sáıkes bıylǵy jyldyń jeltoqsanyna Aqsý qant zaýytyn iske qosýdyń barlyq alǵysharttary jasalyp, iske kiristik. Eń bastysy ırrıgatsııalyq júıeni qalpyna keltirýden bastap daıyn ónimdi óndirýge deıingi tuqym alý, arzandatylǵan baǵamen janar-jaǵarmaı alý, tehnıkamen qamtý, qyzylsha sebý men ony kútip-baptaý, jınaý men zaýytqa ótkizý sııaqty barlyq protsesterdi bir arnaǵa túsirdik. Memleket tarapynan kórsetilip jatqan qoldaýlar nátıjesinde qant qyzylshasyn sebýge nıet bildirip jatqan sharýashylyqtar qatary artyp keledi. Endi Aqsý qant zaýytyn iske qossaq, bul Aqsý, Alakól, Sarqan aýdandarynyń sharýashylyqtary úshin jáne jergilikti turǵyndar úshin óziniń tıimdiligin kórsetetin bolady», - dedi A. Batalov.

Zaýytty jóndeý jáne jańǵyrtý jumystaryna ázirge jergilikti 250 turǵyndy jumysqa tartyp otyr. Maýsymdyq kezeń bastalǵan shaqta jumysshylar sany 700-ge jetetin bolady.

Jalpy oblysta bıyl 9 myń gektarǵa qant qyzylshasy egilip, mamyr aıynyń on besine deıin tátti túbir sebý jumystary aıaqtalady dep kútilýde.