10 jylda Japonııa Qazaqstan ekonomıkasyna 4,5 mlrd dollar ınvestıtsııa quıdy

ASTANA. QazAqparat - 10 jylda Japonııa Qazaqstan ekonomıkasyna 4,5 mlrd dollar ınvestıtsııa quıdy. Bul týraly búgin «Energııa bolashaǵy jáne japondyq tehnologııa» atty japondyq-qazaqstandyq yntymaqtastyq jónindegi semınar barysynda KAZENERGY qaýymdastyǵy tóraǵasynyń orynbasary Uzaqbaı Qarabalın málim etti.

«2015 jyly eki eldiń arasyndaǵy taýar aınalymy 1,5 mlrd dollardy qurady. Sońǵy 10 jyl ishinde Qazaqstan ekonomıkasyna salynǵan japondyq ınvestıtsııa kólemi 4,5 mlrd dollardy qurady», - dedi U.Qarabalın.

Onyń aıtýynsha, ınvestıtsııanyń negizgi úlesi ýran óndirý jáne ýran ónimderin shyǵarý salalaryn qamtıdy. «Degenmen bizdiń elderimizde energetıkalyq, munaı-gaz salalarynda, ásirese energııa tıimdiligi men parnıkti gazdar shyǵaryndylaryn tómendetý salalarynda yntymaqtastyqtyń zor áleýeti bar», - dedi ol.

Sonymen qatar ol búgingi jıyn aldaǵy ýaqyttaǵy Japonııa Premer-Mınıstriniń Qazaqstanǵa saparyna myǵym negiz qalaıtyndyǵyn, eki eldiń kompanııalar arasyndaǵy seriktestik baılanystardy nyǵaıtatyndyǵyn basa aıtty.