10 jylda «Astana» HQO Azııanyń úzdik qarjy ortalyǵyna enýge umtylady

ASTANA. QazAqparat - «Astana» halyqaralyq qarjy ortalyǵyn aldaǵy 10 jyldyń ishinde Azııadaǵy eń damyǵan 20 qarjy ortalyqtarynyń qataryna engizý josparlanyp otyr. Bul týraly senatorlardyń «Astana» halyqaralyq qarjy ortalyǵyndaǵy kóshpeli otyrysy kezinde «Astana» HQO basqarýshysy Qaırat Kelimbetov málim etti, dep habarlaıdy «QazAqparat» HAA tilshisi.

«Jalpy, biz tuńǵysh ret jahandyq ındekstiń ishinen oryn aldyq. Ol ındekstiń ishinde 100-ge tarta qarjy ortalyǵy bar. Biz ázirge joǵary  orynǵa qol jetkizgen joqpyz. Dese de, Shyǵys Eýropa men Ortalyq Azııa elderindegi qarjy ortalyqtarynyń ishinde biz alǵashqy ondyqqa endik. Al jalpy aldaǵy «Astana» HQO-ny 10 jyldyń ishinde Azııanyń eń damyǵan 20 qarjy ortalyqtarynyń qataryna engizý kózdelýde», - dedi ortalyqtyń basqarýshysy.

Qaırat Kelimbetov Qazaqstan damyǵan 30 eldiń qataryna ený mejesin baǵyndyrǵan ýaqytta ortalyq óziniń aldyna odan da joǵary maqsattardy qoıatynyn atap ótti.

«Bıylǵy maqsat - qarjy ortalyǵymyzdy álemdik ınvestorlarǵa tanystyrý bolatyn. Qańtar aıynan bastap, biz bul jumysty júrgizip kelemiz. Bul baǵyttaǵy sharýanyń shyńy - 4-5 shilde kúnderi ótetin halyqaralyq tusaýkeser bolmaq. Tusaýkeser Astanadaǵy EKSPO-nyń Kongres ortalyǵynda ótedi. 4 shilde kúni dál sol jerde Búkilálemdik Islam ekonomıkalyq forýmy ótkizilse, 5 shilde kúni ótetin tusaýkeser jumysymyzdy resmı túrde bastap ketýge múmkindik beredi», - dedi Kelimbetov.

Eske sala ketsek, atalǵan otyrysta Qaırat Kelimbetov «Astana» halyqaralyq qarjy ortalyǵynyń negizgi bes strategııalyq baǵytyn ataǵan bolatyn. Naqtyraq aıtqanda, elordadaǵy qarjylyq ortalyq Kapıtal naryǵy, Aktıvterdi basqarý men Private Banking, Islam qarjylandyrýy jáne Jańa qarjylyq tehnologııalarǵa basymdyq bermek.