10 joǵary oqý orny men 10 kolledj anyqtaldy

ASTANA. QazAqparat - Investıtsııalar jáne damý mınıstri Áset Isekeshev údemeli ındýstrıaldy-ınnovatsııalyq damý baǵdarlamasynyń (ÚIIDB) ekinshi kezeńi aıasynda 2020 jylǵa deıin elimizde 60 myń maman daıarlaý josparlanǵanyn habarlady. Sonyń ishinde, 19 myńy - joǵary bilimdi mamandar bolmaq. Mınıstrdiń aıtýynsha, ÚIIDB-nyń ekinshi besjyldyǵynyń josparyn ázirleý kezinde naqty salalardy qoldaýdyń ornyna, negizinen sapasy joǵary eńbek kapıtalyn qalyptastyrýǵa nazar aýdaryldy.

Beıindik mınıstrliktiń taratqan málimetteri boıynsha, 2015 jyldyń sońyna deıin jalpy quny 600 mlrd. teńgeni quraıtyn 80 jańa jobany iske qosý josparlanǵan. Jańa jobalardyń qatarynda Pavlodar oblysyndaǵy Bozshakól ken-baıytý kombınaty, Almaty oblysyndaǵy shoıyn balqytý óndirisi, Batys Qazaqstan oblysyndaǵy K5 ekoklasyndaǵy qozǵaltqysh maıyn shyǵarý kásiporyndary bar. Árıne, atalǵan kásiporyndarǵa sapaly, bilikti mamandardyń qajet ekeni daýsyz. Atap aıtarlyǵy, Bilim jáne ǵylym mınıstrligi ÚIIDB-2-niń nysandaryna qajetti mamandardy daıyndaıtyn joǵary oqý oryndary men kolledjderdiń tizimin jasady. Investıtsııalar jáne damý mınıstrligi habarlaǵandaı, 2015-2019 jyldary elimizde 257 respýblıkalyq jáne óńirlik jobalar júzege asyrylady, olarǵa 46,6 myń maman qajet.

Bul mamandardy kim daıyndaıdy? Aǵymdaǵy jyldyń 24 tamyzynda Ortalyq kommýnıkatsııalar qyzmetindegi baspasóz máslıhatynda Bilim jáne ǵylym mınıstrliginiń ókilderi kásiptik-tehnıkalyq bilim berý salasynda «Kásipqor» holdıngi men Qazaqstandaǵy 10 kolledjdiń arasynda damý jónindegi kelisimderge qol qoıylǵanyn málimdedi. Olardyń aıtýynsha, ÚIIDB-2-niń qajettilikterin qanaǵattandyrý úshin «Kásipqor» holdınginiń bilim berý baǵdarlamasyn sátimen engizý týraly usynystar ázirlengen. Osy usynystardyń negizinde halyqaralyq tájirıbe men ındýstrııalandyrý talaptaryn eskere otyryp, 8 bilim berý baǵdarlamasy daıyndaldy. 2017-2018 jyldary jumys berýshilerdiń qatysýymen taǵy 16 baǵdarlama engiziledi. Atalǵan baǵdarlamalardy 2 kolledj bıyldan bastap, qalǵan 8-i 2016 jyldan bastap bilim berý úderisine engizedi. Aıta ketelik, tańdap alynǵan 10 kolledjdiń 6-ýy - Dúnıejúzilik banktiń qaryzy esebinen júzege asyrylatyn «Tehnıkalyq jáne kásiptik bilim berýdi jetildirý» jobasynyń grant ıegerleri. Osy joba aıasynda kolledjder jalpy somasy 425 mln. teńgege qurylǵylarmen jabdyqtaldy.

Mınıstrliktiń baspasóz qyzmetiniń habarlaýynsha, bıyl 90-nan astam ınjener-pedagog mamandar jańa oqytý tehnologııasy men zamanaýı menedjment boıynsha ózderiniń biliktiligin kóteredi. ÚIIDB-2-ge maman daıyndaıtyn kolledjderdiń 30-dan astam ustazdary men óndiristik oqytý sheberleri jańasha oqytý tehnologııasy boıynsha sheteldik ortalyqtarda biliktiligin arttyrady. Indýstrııanyń qajettilikterin eskere otyryp, 2016-2018 jyldary kásiptik-tehnıkalyq bilim berýge 400 oryn kóleminde memlekettik bilim berý tapsyrysyn bólý josparlanyp otyr. Bul maqsatqa jyl saıyn 135 mln. teńge kerek eken. Al joǵary jáne odan keıingi bilim berý salasynda jobalardy qazirgi zamanǵa saı mamandarmen qamtamasyz etý ınnovatsııalyq bilim berý baǵdarlamasyn engizýge jáne jańa zerthanalyq qurylǵylardy oqytýǵa negizdeledi. Qazirdiń ózinde bazalyq joǵary oqý oryndarynda 24 jańa baǵdarlama jasalyp, 24 jańa zerthana qurylǵan. Qarajat máselesin oń sheshý úshin, zerthanalardy qurýǵa 10 mlrd. teńge bólý qarastyrylǵan. Sonyń ishinde, 2015-2016 jyldarǵa - 3 mlrd. teńge, 2017 jylǵa - 4 mlrd. teńge bólinedi. Sondaı-aq, bilim berý baǵdarlamalaryn jasaýǵa 2015-2017 jyldarǵa bıýdjetten jylyna 962,1 mln. teńge bólý josparlanyp otyr. Atap aıtarlyǵy, 2015-2016 oqý jylynan bastap bazalyq joǵary oqý oryndarynda ÚIIDB-2-niń sheńberinde magıstranttar jańa baǵdarlama boıynsha oqıdy. Bıyl beıindik magıstratýra boıynsha 1900 orynǵa memlekettik bilim berý tapsyrysy bólingen. Eń bastysy, Bilim jáne ǵylym mınıstrligi 2017 jyldyń sońyna deıin bazalyq ýnıversıtetter men kolledjderdegi ınfraqurylym men materıaldyq-tehnıkalyq bazany damytýdy aıaqtaıdy.