«10 jylǵa sottalýy múmkin»: Shymkentte jalǵan polıtseıler ustaldy

<p>ShYMKENT. KAZINFORM - Shymkentte uıymdasqan qylmysqa qarsy kúres bólinisiniń qyzmetkerleri qala turǵyndaryna kúsh qoldaný arqyly úlken kólemdegi qarajatty ashyq túrde ıemdengen úsh er adamdy ustady, dep habarlaıdy Polisia.kz.</p>

«Qaskúnemder polıtsııa qyzmetkerleriniń atyn jamylyp, turaqty túrde aqsha bopsalaýmen aınalysyp, «qorǵaýǵa» alamyz dep, aı saıyn tólem talap etken. Kúdiktilerdiń birinen polıtsııa qyzmetkeriniń jalǵan qyzmettik kýáligi tárkilendi. Al ekinshi kúdikti alaıaqtyq úshin buryn sottalǵan bolyp shyqty. Mundaı áreketter óz mindetterin adal atqaratyn ishki ister organdary qyzmetkerleriniń bedeline nuqsan keltiredi. Sondyqtan olarǵa qatań túrde tosqaýyl qoıylatyn bolady», – dedi departament bastyǵy – ІІM resmı ókili Shyńǵys Alekeshev.

Onyń aıtýynsha, kúdiktilerdiń barlyǵy ustalyp, ýaqytsha ustaý ızolıatoryna qamaldy. Bopsalaý, tonaý jáne bılik ókili ataǵyn óz betinshe ıemdenip alý faktileri boıynsha qylmystyq is qozǵaldy.

Qazir olardyń osyǵan uqsas basqa qylmystarǵa qatysy bar-joǵy tekserilip jatyr. Qaskóıler 10 jylǵa deıin bas bostandyǵynan aıyrylýy múmkin.

Buǵan deıin Shymkent Polıtsııa departamenti esirtki qylmysyna qarsy is-qımyl basqarmasynyń qyzmetkerleri jedel is-sharalar barysynda esirtki zattaryn ótkizýmen aınalysyp júrgen Almaty turǵynyn quryqtaǵanyn jazǵan edik.