10 jasar shabandoz at sporty túrlerinen ashyq birinshiliktiń jeńimpazy atandy
3 jáne 9 shaqyrymdyq jarystarǵa 20-dan astam shabandoz qatysty.
Aýdannyń ashyq birinshiligi jyl saıyn ótkiziledi. Jarysqa qatysýshylar ony oblystyq týrnır aldyndaǵy aralyq, synaq kezeńi retinde qabyldaıdy.
«Jyl saıyn qatysýshylar sany artyp, at sporty, ulttyq sport túrlerine degen qyzyǵýshylyq artyp keledi. Biz ony qoldaýǵa jáne shabandozdardy yntalandyrýǵa tyrysamyz. Bıyl at sporty birinshiligine 20-dan astam shabandoz qatysty. Negizinen 12 jasqa deıingi oqýshylar», – deıdi Aqtoǵaı aýdanynyń Jastar resýrstyq ortalyǵy basshysy Shyńǵys Elegen.
Taı-jarysqa 16 shabandoz qatysty. Úsh shaqyrymdyq mejeni birinshi bolyp Monshaq atty júırik eńserdi. Shabandozy – Aqtoǵaı aýdandyq mektebiniń tórtinshi synyp oqýshysy Mıras Muratbek.
Top jarysta 8 shabandoz baq synady. Toǵyz shaqyrym qashyqtyqta da Mıras Monshaqpen birge alǵashqy bolyp keldi.
«Men Mıras pen onyń Monshaq atty taıyn qańtardan bastap jattyqtyrdym. Biz qarapaıym qadamnan bastadyq, sodan keıin birtindep tehnıkany ózgerttik. Bul olardyń alǵashqy jarysy jáne olar birden jeńiske jetti. Endi oblystyq týrnırge daıyndalyp jatyrmyz. At sporty damyp kele jatqanyna qýanyshtymyn. Menen basqa aýdanda básekelestik orta qalyptastyratyn taǵy 5–6 jattyqtyrýshy bar. Sondyqtan árqashan umtylatyn bıiktikter jetkilikti», – deıdi jattyqtyrýshy Súıindik Smaǵulov.
Barlyq jeńimpaz kýboktarmen, medaldarmen jáne estelik syılyqtarmen marapattaldy.
Aıta ketý kerek, Qaraǵandy oblysynda at sportyn damytý basqa da aýdandarda qarqyn alyp keledi. Ulytaý aýdanynda oqýshylardy atqa miný mádenıeti úıretilse, Izendi aýylynyń jastary ulttyq sport túrlerinyń tanymaldylyǵyn arttyryp jatyr.