10 ulttyq joba aıasynda 203 myń jumys orny ashylady

ASTANA. QazAqparat – 10 ulttyq joba aıasynda 203,3 myń jumys orny ashylady. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Birinshisi – 10 ulttyq jobanyń aıasynda qurylyp jatqan jumys oryndary. Osy baǵyttaǵy josparly kórsetkishter ortalyq memlekettik jáne jergilikti atqarýshy organdarmen kelisilgen. Búgingi tańda bul jospar 75,6 paıyzǵa oryndaldy. Memleket tarapynan sýbsıdııa beriletin jumys oryndaryn eskergende 203,3 myń jumys orny quryldy. Sharýamyzdyń oıdaǵydaı atqarylýyna «Kásipkerlikti damytý», «Qýatty óńirler – el damýynyń draıveri» jáne «Agroónerkásip keshenin damytý» sııaqty ulttyq jobalardyń tabysty júzege asýy septigin tıgizdi. Jańadan ashylǵan jumys oryndarynyń 92 paıyzy osy 3 jobanyń enshisinde. Al, basqa jobalarda eń azy 492, eń kóbi 6,2 myń jumys orny quryldy», - dedi Tamara Dúısenova.

Mınıstrdiń dereginshe, ulttyq jobalar aıasynda óńirlerde qurylǵan jumys oryndarynyń 55 paıyzy – turaqty. Onda jumys isteıtin azamattardyń 46 paıyzy mindetti zeınetaqy jarnasyn tólep otyr. Bul rette, turaqty jumys oryndaryn qurý boıynsha eń tómengi kórsetkish Qostanaı, Aqtóbe jáne Aqmola oblystaryna tıesili.

«Osy oraıda, Qyzylorda oblysynyń óte jaqsy nátıjege qol jetkizgenin atap ótken jón. Oblysta qurylǵan jumys oryndarynyń 88 paıyzy – turaqty jumys orny. Olardyń 84 paıyzy zeınetaqy aýdarymymen rastalyp otyr», - dedi ol.