10 sotyq jer: qala mańyndaǵy jerlerdi qaıtarý tetigi ázirlenip jatyr

ASTANA. QazAqparat - Ótken aıdaǵy Úkimettiń keńeıtilgen otyrysynda QR Prezıdenti Nursultan Nazarbaev «Nurly jer» baǵdarlamasyn ázirlep, sonyń aıasynda bos jatqan aýyl sharýashylyǵy jerlerin jekemenshik turǵyn úı qurylysy úshin memlekettiń muqtajdyǵyna qaıtarý tetigin ázirleýdi tapsyrǵan bolatyn. Aýyl sharýashylyǵy vıtse-mınıstri Erlan Nysanbaevtyń aıtýynsha atalǵan norma kelesi jylda is júzinde qoldanysqa engizilýi ábden múmkin, dep habarlaıdy QazAqparat tilshisi.

«Biz ol máseleni zań jobasyna engizip jatyrmyz. Genplanǵa (qalanyń bas jospary - avt.) sáıkes, aýyl sharýashylyq nysanyndaǵy jerlerdi úkimettiń qajettiligine alý jóninde normany otyrǵyzyp jatyrmyz osy zań jobasyna. Búgingi jaǵdaıda ondaı norma kerek. Biraq bas josparǵa sáıkes», - dedi vıtse-mınıstr E.Nysanbaev «QazAqparat» tilshisine bergen suhbatynda.
Onyń sózine qaraǵanda, atalǵan norma jyldyń aıaǵyna deıin qabyldansa, kelesi jyldyń kókteminde is júzinde qoldanylatyn bolady.
Búginde jergilikti bılik, ıaǵnı ákimdikter kezinde jekemenshikke ótip ketken qala mańyndaǵy jerlerdi memleket menshigine qaıtara almaı otyr. Sebebi zań boıynsha tek áleýmettik nysan (mektep, balabaqsha, aýrýhana - avt.) salynǵan jaǵdaıda ǵana jekemenshik jerdi qaıtaryp alýǵa múmkindik bar. Prezıdent atalǵan normany ózgertip, bos jatqan jerlerd imemleket menshigine qaıtaryp, 10 sotyq jer retinde taratýdy tapsyrdy. Árıne, ol jerge aldymen ınjenerlik jeliler tartylýy shart. Qalaǵa jaqyn jatqan jerlerdiń tıimdi tusy da sol, ınfraqurylymdy tartýǵa qyrýar qarjy ketpeıdi.
«Ákimder aýyl sharýashylyǵy mınıstrligimen birlese otyryp, qazirgi jer qoryn tolyǵymen túgendep shyǵýy tıis. Osydan keıin qalalardyń bas josparyn ózgertý boıynsha tıisti usynystardy engizý kerek. Ákimderge jerdi memleket menshigine, sonyń ishinde, jeke turǵyn úıge qajetti jerlerdi satyp alý quqyǵyn bergen durys. Iá, qalanyń ishinde jer joq...
...Al qalanyń syrtyndaǵy jerler kim-kóringenniń qolynda ketti. Endi, shalqaıyp jatyr. Ákimder ony alyp qoıa almaıdy. Eger jerdi zańǵa sáıkes ıgermeı jatsa, prokýrorlarmen birge baryp, alyp qoıý qajet. Bolmasa, ózderi satyp alǵan kadastrlyq baǵasymen qaıtarǵan jón.
...Bul máseleni uzaqqa sozýǵa bolmaıdy. Mine, sol kezde adamdar 10 sotyq jerlerin alyp, jeke úılerin sala alady. Buny qolǵa alsaq, qurylys salasy jandana túsedi. Qurylys materıaldaryna suranys kóteriledi. Adamnyń ózi úıi bolǵanǵa ne jetsin! Erteń ol úı balasyna qalady, nemeresine qalady», - dedi Elbasy Úkimettiń keńeıtilgen otyrysynda.