10 mlrd teńgeden astam bereshegi bar 141 salyq tóleýshiniń qaryzy keıinge shegerildi

ASTANA. QazAqparat – Elimiz boıynsha 10 mlrd teńgeden astam bereshegi bar 141 salyq tóleýshiniń qaryzyn keıinge shegerýge jáne bólip tóleýge ruqsat berildi. Bul týraly Instagram-da ótken tikeleı efırde Memlekettik kirister komıtetiniń bereshekpen jáne dármensiz boryshkerlermen jumys basqarmasynyń basshysy Erlan Dalbın aıtty, dep habarlaıdy QazAqparat tilshisi.

«Salyq tóleýshilerde ýaqytsha qarjylyq qıyndyqtar týyndaǵan kezde salyqtardy tóleý jáne ony keıinge qaldyrý tártibi zańmen rettelgen. Respýblıka boıynsha 10 mlrd teńgeden astam bereshegi bar 141 salyq tóleýshiniń qaryzyn keıinge shegerýge jáne bólip tóleýge ruqsat etildi. Onyń ishinde búginde 1,8 mlrd teńge salyq tólendi», - dep toqtaldy Erlan Dalbın.

Onyń aıtýynsha, qarjylyq qıyndyqtar týyndaǵan jaǵdaıda salyq tóleýshilerge eki sheshim usynylady.

«Salyq tóleýdi keıinge qaldyrý merzimi 6 aıdan aspaıdy. Al ekinshi nusqa ol – bólip tóleý. Ol 3 jylǵa deıinge merzimge arnalǵan. Salyq tóleýshi bereshegin aı saıyn ne bolmasa toqsan saıyn tólep turýy tıis. Bólip tóleý jeke kásipkerlik, ımport úshin qosymsha qun salyǵy, Ulttyq qorǵa túsetin salyq jáne aktsızderden basqa salyq túrlerine júredi. Biraq mundaı múmkindik alý úshin arnaıy talap bar. Máselen, maýsymdyq taýar túrlerin óndirýshiler, jeke kásipker retinde tirkelmegen zańdy tulalar, sondaı-aq tótenshe jaǵdaılar kezinde qarjylyq qıyndyqtarǵa tap bolǵan salyq tóleýshilerge osyndaı múmkindik usynylady», - dep túsindirdi basqarma basshysy.

Qosa ketsek, bıyl alǵashqy toqsanda bıýdjetke 5,7 trln teńge salyq tústi.