10 aıda Ulttyq qorǵa 3,6 trln teńge túsip, 3,7 trln teńge alynǵan

<p>On aıdyń ishinde Ulttyq qordan bıýdjetke dep alynǵan transfertterdiń kólemi túsimderden artyp ketken. Ulttyq bank tóraǵasynyń orynbasary Danııar Vagapov Úkimet otyrysynda osyndaı derek keltirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Ulttyq qordyń aktıvteri jyl basynan 56,3 mlrd dollarǵa deıin, 1,1% ósti. Oǵan ınvestıtsııalyq tabystyń artýy birden-bir sebep boldy. Ol jyl basynan 3,3% artyp, 1,83 mlrd dollarǵa jetti. Jyl basynan beri qorǵa túsken túsimderdiń barlyǵy 3,6 trln teńge boldy. Ulttyq qordan respýblıkalyq bıýdjetke bólingen transfertter 3,7 trln boldy», - dedi Danııar Vagapov.

Sondaı-aq, ol jyl basynan beri teńgeniń dollarǵa shaqqandaǵy baǵamy 469,64 teńgege deıin, 1,5% álsiregenin, bul syrtqy jáne ishki faktorǵa baılanysty ekenin atap ótti.

«Birinshiden, bul – dollardyń jahandyq nyǵaıýy. Oǵan AQSh-tyń Federaldy rezervtik júıesiniń qatań aqsha-kredıt saıasaty áser etip otyr. Ekinshiden, ımporttaýshylar tarapynan maýsymdyq suranystyń artýy. Oǵan jobalardy iske asyrý jáne bıýdjet qarajatyn ıgerý tsıkliniń jandanýy men basqa da faktorlar yqpal etýde», - dedi Ulttyq bank tóraǵasynyń orynbasary.