10 aıda negizgi kapıtalǵa 9,4 trln teńge ınvestıtsııa tartyldy

NUR-SULTAN. QazAqparat - 2020 jyldyń 10 aıynda negizgi kapıtalǵa 9,4 trln teńge somasynda ınvestıtsııa tartyldy. Bul týraly búgin Úkimet otyrysynda 10 aıdaǵy elimizdiń áleýmettik-ekonomıkalyq damýy jaıynda baıandaǵan QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Negizgi kapıtalǵa 9,4 trln teńge somasynda ınvestıtsııa tartyldy. 13 óńir ósý kórsetti. Onyń ishinde eń joǵary kórsetkishter Túrkistan oblysynda jáne Shymkent qalasynda baıqalyp otyr. 4 óńirde tómendeý tirkeldi. Olar: Batys Qazaqstan, Atyraý, Qyzylorda jáne Qaraǵandy oblystary», - dedi mınıstr.

Onyń aıtýynsha, qurylys sektory serpindi ósýdi kórsetip otyr. Oryndalǵan jumystardyń kólemi 10,7 paıyzǵa ósti. Belsendi qurylys jumystary Túrkistan oblysynda jáne Shymkent qalasynda baıqalady. 10,7 mln sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 9,7 paıyzǵa kóp.

Óńirlerde 7 ekonomıkalyq kórsetkish boıynsha jalpy jaǵdaı kelesideı. 5 kórsetkish boıynsha 9 óńirde ósý baıqalady. Olar: Aqmola, Almaty, Jambyl, Qostanaı, Mańǵystaý, Pavlodar, Soltústik Qazaqstan, Túrkistan oblystary jáne Shymkent qalasy. Sondaı-aq 6 óńirde 3-4 kórsetkish boıynsha ósý tirkeldi. Bul ortasha deńgeı. 2 óńirde 2 kórsetkish boıynsha ǵana ósý baıqalady. Olar: Qyzylorda jáne Batys Qazaqstan oblystary», - dedi Rýslan Dálenov.