10 aıda mashına jasaý salasyndaǵy óndiris kólemi 27% ósti

<p>QR Premer-Mınıstri Álıhan Smaıylov Qazaqstan mashına jasaýshylar odaǵynyń basqarma tóraǵasy Meıram Pishembaevpen kezdesti, dep habarlaıdy <a href="https://kaz.inform.kz/" target="_blank" rel="noopener">Kazinform</a> QR Úkimetiniń baspasóz qyzmetine silteme jasap.&nbsp;</p>

Kezdesýde mashına jasaýdy damytýdyń 2024-2028 jyldarǵa arnalǵan keshendi josparyn júzege asyrýdyń negizgi baǵyttary talqylandy. Álıhan Smaıylov mashına jasaý salasyndaǵy óndiristiń ósý qarqynyna oń baǵa bere otyryp, qabyldanǵan qujattyń mańyzdylyǵyn atap ótti.

Onyń aıtýynsha, Keshendi jospardy júzege asyrý mashına jasaý salasyn ǵana emes, tutastaı alǵanda elimizdiń óńdeýshi ónerkásibin damytýǵa yqpal etedi.

Keshendi jospar 7 baǵyt boıynsha 79 is-sharadan turady. Jospardyń oryndalýy 2028 jylǵa qaraı JQQ-nyń (jalpy qosylǵan qun) 4,5 ese, NKI-diń (naqty kólem ındeksi) 2,2 ese, eksport kóleminiń 3 ese, ınvestıtsııa kóleminiń 1,5 esege ósimin qamtamasyz etedi.

Meıram Pishembaevtyń aıtýynsha, Keshendi jospardy júzege asyrý otandyq mashına jasaýdy damytýǵa aıtarlyqtaı serpin beredi, óndiris kólemin arttyrýǵa, eksporttyq múmkindikterdi damytýǵa, sondaı-aq ınvestıtsııa tartýǵa jáne bilikti kadrlardy daıarlaý júıesin jetildirýge yqpal etedi.

«Keshendi jospardy júzege asyrý búgingi tańdaǵy basymdyǵymyz jáne mindetimiz. Belgilengen nysanaly ındıkatorlardyń sapaly oryndalýyn qamtamasyz etý jáne otandyq mashına jasaý salasyn odan ári jańǵyrtý úshin bar kúsh-jigerimizdi salamyz», — dedi Qazaqstan mashına jasaýshylar odaǵynyń basshysy.

Mashına jasaý 37 tarmaqty qamtıtyn jáne ekonomıkanyń barlyq derlik salalaryn jabdyqtarmen qamtamasyz etetin eń joǵary tehnologııaly sala ekenin aıta ketken jón. Saladaǵy bir jumys orny shektes salalarda 8-10 jumys ornyn paıda bolýyna alyp keledi.

2022 jyldyń qorytyndysy boıynsha elimizdiń mashına jasaý salasyndaǵy óndiristiń fızıkalyq kólemi 11%-ǵa ósse, 2023 jyldyń 10 aıynda 27%-ǵa ósim kórsetti. 2023 jyldyń qańtar-qazan aılary aralyǵynda 3,3 trln teńgege ónim óndirildi.

Eske salaıyq, Memleket basshysy 2023 jylǵy 1 qyrkúıektegi Joldaýynda mashına jasaý ındýstrııalyq ósýdiń draıveri bolyp tabylatyn óńdeýshi ónerkásipti údemeli damytýdy basty mindetterdiń biri retinde belgilegen bolatyn. Mashına jasaý salasyn odan ári jańǵyrtý el ekonomıkasyn ártaraptandyrý men ındýstrııalandyrýǵa jańa serpin beredi.