10-11 synyp oqýshylary úshin aǵylshyn tili pániniń saǵaty kóbeıedi

ASTANA. QazAqparat – 10-11 synyp oqýshylary úshin aǵylshyn tili pániniń saǵatyn kóbeıtý josparlanyp otyr. Ortalyq kommýnıkatsııalar qyzmetinde ótken brıfıngide Oqý-aǵartý mınıstri Ashat Aımaǵambetov osylaı málimdedi, dep habarlaıdy QazAqparat tilshisi.

«Matematıka, fızıka, hımııa, bıologııa pánderiniń saǵattaryn kóbeıtý josparlanyp otyr. Sondaı-aq, oqý baǵdarlamalary da jańartylady. Muǵalimderge qosymsha kýrstar uıymdastyrylady. «STEM» bilim berý tásilderine negizdelgen jaratylystaný-matematıka pánderin oqytýdy kúsheıtý josparlanyp otyr. Sonymen qatar, joǵary synyptarda aǵylshyn tilin úırenýge, naqtyraq aıtqanda, 10-11 synyptardaǵy aǵylshyn tili saǵatyn kóbeıtýge, baǵdarlamalardy jańartýǵa jáne muǵalimderdiń biliktiligin arttyrýǵa basa mán beriledi. 2024 jyldan bastap «CEFR» boıynsha 3-synypta aǵylshyn tilin oqytý saǵattaryn ulǵaıtý men qazaq jáne orys tilderin meńgerý úshin qajetti oqý júktemesin qamtamasyz etý sharalary qabyldanady», - dep atap ótti Ashat Aımaǵambetov.

Qosa ketsek, sonymen qatar mınıstr «Jaıly mektep» ulttyq jobasy aıasynda keminde 800 myń oqýshy orny ashylatynyn málimdep edi.