1 jeltoqsan - halqymyzdyń baq shamynyń janǵan kúni - Ǵarıfolla Esim

ASTANA. 28 qarasha. QazAqparat - Búgin Astanada «Qazaqstan Respýblıkasynyń Tuńǵysh Prezıdenti - táýelsiz memlekettilik sımvoly» taqyrybynda ǵylymı-tájirıbelik konferentsııa óz jumysyn bastady.

«Ǵasyrlar armany oryndaldy. 1991 jylǵy 1 jeltoqsandy jańa zamannyń basy deýge bolady, Táýelsizdik saltanaty ornady. Bul kúni halyq óziniń erkin bildirip, tuńǵysh ret halyqtyń ortasynan shyqqan, eńbegimen, bilimimen, elge degen asyl ynta-jigerimen kóringen azamatyn - Nursultan Ábishuly Nazarbaevty Prezıdent etip saılaı aldy. Bul bolmaǵan oqıǵa edi»,-dedi L. N. Gýmılev atyndaǵy EUÝ áleýmettik ǵylymdar fakýlteti fılosofııa kafedrasynyń meńgerýshisi, fılosofııa ǵylymdarynyń doktory Ǵarıfolla Esim.  Osy oraıda Ǵ. Esim atalǵan datany qazaq halqynyń baq shamynyń janǵan kúni dep atap ótti.  «Biz «qazirgi zaman» dep aıtamyz. Meniń oıymsha, «qazirgi zaman» osy 1991 jylǵy 1 jeltoqsannan bastalady. Nege deseńizder, halyqtyń erki bárinen bıik. Halyq óz erkimen 1 jeltoqsan kúni tańdaýyn jasap, Prezıdentin jappaı saılady. Sondyqtan qazaqtyń baq shamy janǵan kúni, ıaǵnı osy ataýly kún biz úshin erekshe»,-dedi ol.  Konferentsııanyń maqsaty - Qazaqstan Respýblıkasynyń Tuńǵysh Prezıdentiniń memlekettilikti nyǵaıtýdaǵy rólin, saıası, áleýmettik-ekonomıkalyq reformalardy sátti júrgizýdegi, sonymen qatar elimizdegi qaýipsizdik, beıbitshilik pen kelisimdi qamtamasyz etýdegi qyzmetin talqylaý. Jıynǵa Parlament depýtattary, memlekettik organdardyń, ǵylymı-shyǵarmashylyq zııaly qaýym ókilderi, saıasattanýshy ǵalymdar men sarapshylar, azamattyq qoǵam ınstıtýtynyń ókilderi qatysýda.