1-jartyjyldyqta teńge 2,2 paıyzǵa nyǵaıdy

ASTANA. QazAqparat – Ulttyq bank valıýtalyq ınterventsııalar júrgizgen joq. Bul týraly Úkimet otyrysynda Ulttyq bank tóraǵasynyń orynbasary Vıtalıı Týtýshkın aıtty, dep habarlaıdy QazAqparat tilshisi.

«1-jartyjyldyqta teńge 452,26 deıin 2,2 paıyzǵa nyǵaıdy. Ulttyq qordan respýblıkalyq bıýdjetke beriletin transfertterdi qamtamasyz etý úshin valıýtany satýy, sonymen qatar kvazımemlekettik sektor sýbektileriniń 1,9 mlrd dollar somasyna valıýtalyq túsiminiń 50 paıyzyn mindetti túrde satýy teńgege qoldaý kórsetti. Valıýta naryǵyn balansqa keltirýdiń jaqsarýyna baılanysty 1 shildeden bastap valıýtalyq túsimdi mindetti túrde satý úlesi 30 paıyzǵa deıin tómendedi», - dedi ol.

Onyń atap ótýinshe, teńgedegi quraldardyń tartymdylyǵy saqtalýda. Depozıtterdi dollarlandyrý deńgeıi 2022 jylǵy jeltoqsandaǵy 31,6 paıyzdan osy jylǵy mamyr aıynyń qorytyndysy boıynsha 28,4 paıyzǵa deıin tómendedi. Sheteldik ınvestorlardyń memlekettik baǵaly qaǵazdarǵa ınvestıtsııalary jyl basynan beri 78 mlrd teńgege ulǵaıdy.

«Ulttyq bank valıýtalyq ınterventsııalar júrgizgen joq. Teńgeniń budan bylaıǵy dınamıkasy naryqqa qatysýshylardyń kútýlerine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady. Ulttyq bank ıkemdi baǵam belgileý rejımin ustanýdy jalǵastyrady», - dedi UB tóraǵasynyń orynbasary.

Osyǵan deıin Úkimet basshysy memlekettiń ekonomıkadaǵy úlesin JÓІ-niń 14,4 paıyzyna deıin qysqartý kerektigin aıtqanyn jazdyq.