1-synypta oqytylatyn «Kórkem eńbek» páni ekige bólindi

NUR-SULTAN. QazAqparat – Bıyl 1-synyptar úshin «Kórkem eńbek» páni «Beıneleý óneri» jáne «Eńbekke baýlý» bolyp eki jeke pánge bólindi. Bul týraly Y.Altynsarın atyndaǵy Ulttyq bilim akademııasynyń prezıdenti Madına Tynybaeva aıtty, dep habarlaıdy QazAqparat.

«1-synyptar úshin «Kórkem eńbek» páni «Beıneleý óneri» jáne «Eńbekke baýlý» bolyp eki jeke pánge bólindi. Bul pánder boıynsha oqý baǵdarlamalary ázirlendi. Oqý mazmunynda negizgi basymdyq bilim alýshylardyń praktıkalyq daǵdylaryn qalyptastyrýǵa beriledi. Bıyl «Eńbekke baýlý» men «Beıneleý óneri» pánderi boıynsha oqýlyqtar ázirlenbeıdi, tek muǵalimge ádistemelik qoldaý maqsatynda ádistemelik nusqaýlyq usynylady. Al 2-4 synyptarǵa bıylǵy oqý jylynda «Kórkem eńbek» pánin oqytý jalǵasady», - dedi M. Tynybaeva.

Sonymen qatar jańa oqý jylynan bastap «Jahandyq quzyretter» kýrsy 5-11 synyptarǵa mindetti kýrs retinde oqytylady.

«Kýrs 5-9 synyptarda «Parasattylyq jáne etıka», «Ekologııalyq mádenıet», «Azamattyq jáne patrıotızm», «Ómir súrý qaýipsizdigi», «Medıasaýattylyq jáne qarjylyq saýattylyq» syndy 5 bólimdi qamtıdy. «Jahandyq quzyretter» kýrsynan qaı pánniń muǵalimderi sabaq beredi degen suraq jıi týyndaıdy. «Órleý» biliktilik arttyrý ortalyǵynyń «Jahandyq quzyretter» bilim berý baǵdarlamasy boıynsha oqý kýrsynan ótken barlyq muǵalim bul pándi júrgize alady», - dep tolyqtyrdy akademııa prezıdenti.