1 shildeden bastap Eýroodaq elderinde «jasyl pasport» engiziledi

NUR-SULTAN. QazAqparat – EO keńesi men Eýroparlament Eýroodaqta biryńǵaı vaktsınatsııa sertıfıkattaryn engizý týraly kelisti. «Jasyl pasport» degen atpen belgili mundaı qujat tsıfrlyq túrde bolady. Onda ár azamatqa qatysty kovıdpen baılanysty aýrýy, PTR testileriniń nátıjeleri, vaktsınatsııa sekildi barlyq málimet kórsetiledi. «Jasyl pasport» 1 shildeden bastap qoldanysqa enedi, dep habarlaıdy QazAqparat Euronews-ke silteme jasap.

Ekpe alǵan mundaı sertıfıkattyń ıesin medıtsınalyq sebepterge baılanysty EO eline kirgizbeýge negiz joq.

«Aıta ketý kerek, vaktsınanyń eki dozasyn alǵannan keıin azamat tolyq egildi dep sanalady. Sertıfıkat qandaı doza, qashan egilgeni týraly barlyq málimetti kórsetedi. Bul sertıfıkat elge sizdi kirgizýge sebep bolýy múmkin. Biraq sizge ruqsat berilý úshin siz tolyqtaı egilýińiz qajet», - dedi Ádilet máseleleri jónindegi eýrokomıssar Dıde Reınders.

Tek EO nemese DDU deńgeıinde maquldanǵan vaktsınalar qarastyrylady. Ázirge bul tizimge Reseı nemese qytaı preparaty kirmegen. Alaıda, Majarstanda olar belsendi túrde qoldanylady. Biraq EO-nyń ár eline óz krıterıılerine sáıkes jalpy eýropalyq sertıfıkaty joq adamdarǵa kirýge ruqsat etý quqyǵy jeke beriledi.