1 shildeden áleýmettik qamsyzdandyrý salasyna baqylaý jasaıtyn ınspektorlar jumysyn bastaıdy

ASTANA. QazAqparat – Jańa Áleýmettik kodekske saı, 1 shildeden bastap el boıynsha Memlekettik áleýmettik qorǵaý ınspektorlary óz qyzmetine kirisedi, dep habarlaıdy QazAqparat tilshisi.

«Ózderińiz biletindeı, 20 sáýirde Áleýmettik kodeks qabyldandy. Onyń jańashyldyqtarynyń biri - 1 shildeden bastap Memlekettik áleýmettik qorǵaý ınspektorlaryn engizý. Olar Kásipkerlik kodekske sáıkes, múgedektigi bar adamdardy áleýmettik qorǵaý, arnaýly áleýmettik qyzmetter kórsetý, zeınetaqy jáne áleýmettik qamsyzdandyrý salasyndaǵy baqylaý fýnktsııalaryn iske asyratyn bolady. Ol úshin táýekel dárejesin baǵalaý krıterııleri men tekserý paraqtary kúsheıtildi», - dedi Eńbek jáne áleýmettik qorǵaý komıtetiniń tóraǵasy Tólegen Ospanqulov OKQ-de ótken brıfıngide.

Spıker túsindirgendeı, engiziletin ózgerister múgedek adamdardy áleýmettik qorǵaý, arnaýly qyzmetter, áleýmettik qamsyzdandyrý máseleleri boıynsha zańnama normalaryn saqtaý jóninde ýaqtyly jáne jedel sharalar qabyldaýǵa múmkindik bermek. Sáıkesinshe, áleýmettik saladaǵy memlekettik baqylaý kúsheıedi.