1 shildede qazaqy ıt tuqymdarynyń ulttyq ortalyǵy iske qosylady

ASTANA. QazAqparat – Bıyl 1 shildeden bastap qazaqy ıt tuqymdary ulttyq ortalyǵy jumysyn bastaıdy. Bul týraly Ekologııa jáne tabıǵı resýrstar mınıstrligi orman sharýashylyǵy jáne janýarlar dúnıesi komıteti tóraǵasynyń orynbasary Andreı Kım málim etti, dep habarlaıdy QazAqparat tilshisi.

Eske sala ketsek, bıyl 3 qańtarda Memleket basshysy qazaqy ıt tuqymdaryn saqtaý týraly zańǵa qol qoıǵan edi.

«Atalǵan zańda orman sharýashylyǵy jáne janýarlar dúnıesi komıtetine qarasty «Ohotzooprom» respýblıkalyq memlekettik qazynalyq kásipornynyń qurylymdyq bólimshesi «qazaqy ıt tuqymdary ulttyq ortalyǵyn» qurý kózdelgen. Onyń ashylýy bıyl shildege josparlanyp otyr. Ulttyq ortalyq qazaqy ıt tuqymdaryn saqtaý jáne kóbeıtýmen aınalysady. Sol sııaqty qazaqy ıttermen aınalysatyn mamandar daıarlanady. Sonymen qatar asyl tuqymdy ıtterdi ósirý jáne olarǵa kýálik berý boıynsha kınologııalyq qyzmet bolady. Qazaqy ıt tuqymdaryn saqtaýmen aınalysatyn zańdy jáne jeke tulǵalarmen birlesip tuqym standarttary pysyqtalyp, synaqtar, kórmeler men baıqaýlar uıymdastyrylady», - dedi Andreı Kım ortalyq kommýnıkatsııalar qyzmeti alańynda ótken baspasóz málshıatynda.

Sondaı-aq, A. Kım ótken jyly respýblıkalyq bıýdjetten 2023, 2024 jáne 2025 jyldarǵa arnalyp 1,4 mlrd teńge qarastyrylǵanyn aıtty.

«Bıyl qarajat 1 shildeden keıin bólinedi. Qarjylandyrý eki baǵyt boıynsha júredi. Birinshisi – qazaqy ıt tuqymdaryn saqtaý jáne olardyń sanyn arttyrý baǵytynda. Ekinshisi, ıtterge dalalyq synaqtar, kórmeler men baıqaýlardy uıymdastyrýǵa memlekettik áleýmettik tapsyrys boıynsha», - deıdi ol.

Onyń aıtýynsha, bıyl memlekettik áleýmettik tapsyrysqa 198 mln teńge jumsaý josparlanǵan.