1 shildede ınternet-saýda salasynda jańa joba iske qosylady

ASTANA. QazAqparat – Bıyl 1 shildeden bastap ınternet-saýdamen aınalysýshylar erikti túrde Memlekettik kirister komıtetine satylymdary týraly esep beredi. Atalǵan jańashyldyq týraly Qarjy mınıstrligi Memlekettik kirister komıtetiniń tóraǵasy Danııar Janálinov aıtyp berdi, dep habarlaıdy QazAqparat tilshisi.

«Bıyl 1 shildeden bastap ınternet-saýda salasynda pılottyq jobany iske qosýdy josparlap otyrmyz. Onyń aıasynda ınternet-saýda alańdary satylymdary týraly derekterdi bizdiń komıtetke, al biz barlyq ınternet alańdardan derekterdi jınap, ony bankterge jiberemiz. Alynǵan derekter negizinde bankter aı saıynǵy salyq somasyn eseptep, klıentterge pýsh-habarlama jiberedi», - dedi Danııar Janálinov OKQ-de ótken brıfıngide.

Sondaı-aq komıtet basshysynyń málimetinshe, salyq kezeńiniń qorytyndysy boıynsha ınternet saýdamen aınalysýshylar salyq deklaratsııasyn toltyrady.

«Bul, aldymen, salyq kezeńinde ony bólip tóleýge múmkindik beredi. Ekinshiden, salyq esebin tapsyrý protsesin jeńildetedi. Búginde elimizde 80 myńnan astam kásipker taýarlaryn ınternet alańdar arqyly satady. Aıta ketetin jaıt, atalǵan pılottyq jobalarǵa qatysý erikti túrde júzege asyrylady», - deıdi Memlekettik kirister komıtetiniń tóraǵasy.

Buǵan deıin D. Janálinov elimizdegi taksı qyzmetine qatysty málimettermen bólisken edi.