1 myńnan astam qazaqstandyq ǵalym ǵylymnan ketti – komıtettiń jaýaby

ASTANA. QazAqparat – Elimizdiń ǵylym komıteti ǵalymdardyń kóptep shetelge ketýine qatysty resmı aqparat berdi, dep habarlaıdy QazAqparat tilshisi.

Ortalyq kommýnıkatsııalar qyzmeti alańynda ótken baspasóz máslıhatynda bylaı suraq qoıyldy: «Osydan birer kún buryn 1 myńnan astam ǵalym ǵylymı jobalardan ketti degen aqparat tarady. Osy qanshalyqty ras? Ras bolsa sebebi nede? Sonymen qatar kóptegen ǵalymdar shetelge ketip jatyr, nelikten?».

Atalǵan saýalǵa QR Ǵylym jáne joǵary bilim mınıstrligi ǵylym komıtetiniń tóraǵasy Darhan Ahmed-Zakı jaýap berdi.

«Iá, aıtylǵan aqparat tarap jatyr. Onyń úsh sebebi bar dep oılaımyz. Birinshi sebep, basqa salalarǵa qaraǵanda ǵylymdy qarjylandyrý tómen boldy. Jalaqynyń tómendeýine baılanysty. Ǵalymdardyń ortasha jalaqysy 250 myń teńge. Basqa salalarmen salystyrsaq bul az. Ekinshi sebep, otandyq ǵalymdar shetelge taǵylymdamadan ótýge baryp jatyr. Onyń ishinde «Bolashaq» baǵdarlamasy da bar. Merzimi ártúrli», - dedi Darhan Ahmed-Zakı.

Komıtet basshysy keltirgen úshinshi sebep zeınet jasyna kelgen ǵalymdardyń saladan ketýi.

«Ǵylymdy damytý tujyrymdamasyna sáıkes zeınetke shyqqan ǵalymdardyń ornyna jańa býyn keledi degen jospar bar. Sol úshin de «Jas ǵalym» jobasyn qolǵa alyp jatyrmyz», - deıdi ol.

Aıta ketsek, elimizde sońǵy úsh jyl ishinde ǵylym salasyna bólinetin qarjy kólemi 70 paıyzǵa artqan.

Sondaı-aq, brıfıng barysynda endigi ýaqytta ǵylymdy qarjylandyrý týraly sheshimdi ǵalymdardyń ózderi qabyldaıtyny aıtyldy.