1 myń bótelke konıakti qoldan jasaǵan almatylyq sottaldy

ALMATY. QazAqparat - Almaty qalasynyń turǵyny araq-sharap ónimin qoldan daıyndaǵan, dep habarlaıdy QazAqparat Qarjy monıtorıngi komıtetin baspasóz qyzmetine silteme jasap.

Qarjy monıtorıngi komıtetiniń Almaty qalasy boıynsha Ekonomıkalyq tergeý departamenti qyzmetkerleri 2020 jylǵy qańtar aıynyń basynda «Qalqaman-2» shaǵynaýdanynda araq-sharap ónimin qoldan daıyndaǵan Almaty qalasy turǵynyna qatysty sotqa deıingi is júrgizýdi tergeý jumysyn aıaqtady.

Jalǵan esepke alý-baqylaý markasy japsyrylǵan 0,5 lıtrlik 1 040 bótelke daıyn «Qazaqstan» konıagi, 525 qoldanylmaǵan esepke alý-baqylaý markasy, 2 kanıstr spırt, bos bótelke, qaqpaq, alkogol ónimin daıyndap, quıýǵa jáne qaqpaqtardy óńdeýge arnalǵan apparat tárkilendi.

«Sottyń úkimi boıynsha aıyptalýshy Qylmystyq kodekstiń 233-babynyń 2-bólimine sáıkes (Aktsızdeletin taýarlardy aktsızdik markalarmen jáne (nemese) esepke alý-baqylaý markalarymen tańbalaýdyń tártibi men qaǵıdalaryn buzý, aktsızdik markalardy jáne (nemese) esepke alý-baqylaý markalaryn qoldan jasaý jáne paıdalaný ) kináli dep tanylyp, oǵan 100 saǵat májbúrli eńbekke tartýmen probatsııalyq baqylaý ornata otyryp, 1 jylǵa bas bostandyǵyn shekteý jazasy taǵaıyndaldy», delingen habarlamada.