1 mln-ǵa jýyq adamnyń 382 mlrd teńge qaryzy kollektorlarǵa berilgen
«Problemalyq kredıtterdi retteý rásimderin iske asyrý arqyly azamattardyń problemalyq bereshek deńgeıin azaıtý mańyzdy shara sanalady. Sońǵy jyldary bankter men mıkroqarjy uıymdary óz balanstaryn tazartý úshin jeke tulǵalardyń problemalyq kredıtterin aıtarlyqtaı jeńildikpen kollektorlarǵa berý praktıkasy qalyptasty. Sondyqtan da qaryz alýshylardyń merzimi ótken bereshekti retteý quqyqtaryn qorǵaý úshin bankter men mıkroqarjy uıymdarynyń azamattardyń kredıtterin tólem merzimi ótken kezden bastap 24 aıdan soń jáne kredıtor bereshekti retteý rásimderin júrgizgennen keıin ǵana kollektorlyq agenttikterge satýyna ruqsat berý usynylady», — dedi ol.
Depýtattyń aıtýynsha, búginde kollektorlyq agenttikter edáýir kólemde jeke tulǵalardyń qaryzdaryn satyp alyp, olar boıynsha qaryzdyń barlyq somasyn qaıta qurylymdaýsyz óndirip jatyr.
«1 qańtardaǵy jaǵdaı boıynsha elimizdiń 890 myń azamatynyń 382 mlrd teńge somasyndaǵy qaryzy kollektorlyq agenttikterge berilgen. Osyǵan oraı, jeke tulǵalardyń satyp alynǵan kredıt bereshegin retteý rásimin júrgizý boıynsha kollektorlardyń tikeleı mindetin engizý usynylady», — dedi Únzıla Shapaq.
Onyń sózine qaraǵanda, halyqtyń shamadan tys kredıt alýyna jol bermeý úshin tutynýshylyq kredıtter boıynsha bereshektiń absolıýtti mólsherin shekteý bóliginde bereshekti retteý rásimin qatańdatýdyń mańyzy zor.
Qazir bankter men mıkroqarjy uıymdarynyń tutynýshylyq kredıti boıynsha bereshektiń ortasha deńgeıi — shamamen 1,5 mln teńge.
Bul rette mundaı kredıt beresheginiń eń joǵary mólsheri zańnamada belgilenbegen.
«Qaryz júktemesiniń shamadan tys ósýin shekteý úshin zańnamalyq turǵyda tutynýshylyq kredıt degen uǵym engiziledi. Bul onyń eń joǵary mánin normatıvtik deńgeıde shekteýge múmkindik beredi. Qosymsha shekteý sharasy retinde jańa makroprýdentsııalyq normatıv — azamattardyń bankter men mıkroqarjy uıymdarynyń kredıtteri boıynsha jıyntyq beresheginiń qaryz alýshynyń tabysyna qatynasy engiziledi», — dedi depýtat.