1 mıllıonnan astam oqýshy saýyqtyrý lagerlerinde demalyp jatyr

NUR-SULTAN. QazAqparat - Jazǵy demalystyń birinshi maýsymynda 1 mıllıonnan astam qazaqstandyq oqýshy saýyqtyrý lagerlerinde demalyp jatyr. Balalarǵa arnalǵan qala syrtyndaǵy, mektep janyndaǵy, kıiz úı jáne shatyr lagerleri jumys isteıdi, dep habarlaıdy QR Oqý-aǵartý mınıstrliginiń baspasóz qyzmeti.

Balalardy saýyqtyrý mekemelerinde eń aldymen jan basyna shaqqandaǵy ortasha tabysy eń tómengi kúnkóris deńgeıinen tómen, ıaǵnı memlekettik ataýly áleýmettik kómek alatyn otbasylardyń balalary tegin demalady. Sondaı-aq jetim balalarǵa, ata-anasynyń qamqorlyǵynsyz qalǵan balalarǵa jáne tótenshe jaǵdaılar saldarynan shuǵyl kómekke muqtaj otbasylardan shyqqan balalarǵa tegin joldamalar beriledi. Balalardyń qala syrtyndaǵy lagerlerde demalýyn jáne saýyqtyrylýyn qarjylandyrý jergilikti bıýdjet esebinen qamtamasyz etiledi.

«Ár balalar lageriniń óz baǵdarlamasy bar, biraq barlyǵynyń taqyryby birdeı bolady. Balalardyń jazǵy demalysyn uıymdastyrýdyń biryńǵaı tásilderin ázirleý maqsatynda Balalardyń quqyqtaryn qorǵaý komıteti jazǵy demalysta balalardyń demalysyn, bos ýaqytyn jáne jumyspen qamtylýyn uıymdastyrý tujyrymdamasyn ázirlep, óńirlerge jiberdi. Tujyrymdamada ár túrli aptalyq taqyryptar men baǵyttar bar. Balalar úshin saýyqtyrý, bilim berý, ekologııalyq, shyǵarmashylyq, sporttyq, kóshbasshylyq baǵytyndaǵy baǵdarlamalar ázirlendi», - dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Esenǵazy Imanǵalıev.

Balalar men ata-analardy qajetti aqparatpen qamtamasyz etý maqsatynda bıyl bala-demalys.kz balalar saýyqtyrý lagerleriniń ınteraktıvti kartasy, saıt jáne mobıldi qosymsha iske qosyldy.